Nov 20 – TURELGUMNA!

Numbers 24:6 “ghati nishina juntu bishi dur thake, bagicha khan nishina nadi kinarte.”

Pahar laga unchain pora, nabi Balaam bhal pora sabole pare Israel laga bacha khan ke tamboo bonai kene thaka tai khan laga  jati hisab te, pahar laga nichete. Tai achburit hoishe itu sundar tamboo khan te aru Isor laga bacah khan thaka te. Tai dikhishe Isor laga bacha khan ke nadi pheli kene thaka nishina.

Shuru hoa laga jaga pora, nadi shuru hoi ekta chutu nala nishina. Hoilebi jitya tai barhi eken jai thake agete, itu ke bhishi jhan khan mile aru bone ekta dangor nadi, bishi pani thaka laga aru tez leher khan. Itu  nishina hi, apuni bi barhibo aru ginti barhabo aru hobo ekta dangor nadi nishina.

Apuni khan kitya bi rukhi nathakibo lage atma laga jibon te, hoilebi barhi thakibo lage, aru hobo lage ekta ashirbaad laga rasta manu khan nimite. Kilekoile atma Isor laga apuni te ase, apuni hi ekta zariya thakibo lage aru ashirbaad dibole lage bishi manu khan ke.

Isor laga bacha khan ke tulna kore khali nadi logote nahoi hoilebi bagicha khan ke nadi laga usorte . jitya kunba bhabna kore ekta bagicha thakibole, tai itu thik kore ki pani bhal pora pabole. Tai itu bi sai ki ki judi tate pani laga rasta ase na nai mati te.

Judi tai ekta guha khundi kene ulabo lage, tinihoile tai chinta koribo judi tai pani bishi ulabo nanai bagicha nimite. Hoilebi judi tai ekta bagicha bonabo nadi kinarte, inika bhabna koribole laga iku nai. itu gash khan laga jor khan gehra nichete jabo aru pani lobo itu nadi pora hi.itu gash khan bo labh hobo ekta urabar mati nadi kinarte.

Itu nishina hi, Isor laga bagicha tu hoile bagicha ase; aru biswasi khan alag alag gash lagi kene thaka bagicha laga ase. Isor laga pobitro atma hi nadi ase juntu samridh kore sob gash khan aru itu ke phal dhuri bole diye. Hoilebi tate khali ekta nadi ase, aru bishi gash khan ase utu adi kinarte. Atma tu ekta ase aru alag alag uphar utu atma laga. Jitya apuni laga jor hi pobitro atma ase, apuni narukhi kene hi phal dhuri thakibo Isor laga.

Itu podh te, isor pora koi ken ease alag alag isim laga gash khan ke. Kiman sundor ase itu  sabole aru aloe khana ru chandan gash khan lagai kene thaka Isor pora nahoilebi cedar khan pani kinarte! Tai khan ke Isor pora hi lagaishe, aru tai khan chare bhal gun Tai laga gyan laga, aru thik jai thake isor nimite.

Isor laga bacha khan , apuni bi thakibo Isor por alagai diya gash nishina? Ki phal khan atma laga, apuni te pabo? Apuni bi thkaibo utu jag ate jote isor pora apuni ke lagai dishe aru thakibo ekta jibon gawahi laga?

Aji bhabna koribole laga pobitro kotha tu hoile psalm 104:16: “gash khan Isor laga ekdom ras thaka ase, Lebanon laga cedar khan juntu tai lagaishe” (palm 104:16)