May 30 – Banuddin do Ganalaman!

“bogad aman ruppadage saijlenden, bar antanzl-bittige anin a d’ong sanillenden; etteden aman GAMANGtungan a d’ong a bantongben asan galamte, bar Kitungan abmele ganalaman hangte” (Bangsa Hangan 2:4-5).

Kuddub bitti-lingan saring Banuddin jznjzn murdam. Banuddin mangbaben yirtai, anindaman. Amben ajaben deten banuddin a d’ong, aman ruppadage saijlenden, bar antanzl-bittige anin a d’ong sanillenden (Bangsa Hanang 2:4-5). Angante amben bangsale asaite, arabngtepo banuddin!

Anappai Jakub gamle: “Bindo bogad mang-ling-ben buteja banuddin sanaisaijan delenden, kuddubanji a d’ong eramuiloge a tiytiylangtenan, do akkaihkaihlangnen a Kitungan amang saring garberete, do anin a d’ong taniyan dete” (Jakub 1:5).

Kitungan a d’ong garba banuddin abmele. Anin Solomon a d’ong adtiyadpo banuddin? Kitungan amang saring itjaja tanodan agasa, Anin janang d’ongben banuddin tiytaben. Kun batte Kitungan m’oihle Solomon a gargarn batte (1 Raja 3:10). Ateng asan Kitungan Solomon a d’ong ganaman do panemengan tiyle, itente anin adgarad (1 Raja 3:13).

Angante amben Kitungan a rajam asaite do a ranoitadan, Anin janang mangbaben maite kuddub. Itedelejanang mukkababen kan kudduban alumben dete, surda orde sanna, Kitungdage a banuddin sanaisai banangsan alumben abmele. Kitungan janang tiytaben a jzbjzblen ambrij do banuddin itente mangbaben yirtai (Luk 21:15).

Butente banuddin do ganalaman timyimteji, aninji Marid Bibolan kinolteji, itente bittidage a dakun ate banuddin do ganalaman. Iten asan gamlenden bibol-lingan, banuddin, ganalaman, Kitungan a janggardan do mandrengnan. Bibolan gamte: “GAMANGtungan anosaijan hadab daku; antate pwrardan absamangte. GAMANGtungan a banaihanji erztnage daku; antate oseng maran a d’ong banuddi mar abmete” (Sanenken 19:7).

Kitungan Anindaman hanghangle Josua a d’ong banuddin bibol-lingan hangtabe gamle. Josua a kamb’ol-lingan, kinoltabe: “Kan anosai kambol beranji t’od-nam saring dunglen yerdongete bindo aman antate a tam anidan ambrij a manneben asan tamba-togal kenolle j’e-ling-nam ogalla, etteden aman a godan anojoraian dete bar aman apsele banangsan dete” (Josua 1:8).

Kitungan sattang Solomon a d’ongan ted bindo Daniel a d’ong janang tiyle banuddin, kun babilon lingan a dakulenji a banuddi maranji saring Anin murdadage banuddimar dakule. Tanahimdam Kitungan a onagji, Kitungan d’ongben banuddin do ganalaman tiytaben.

Okiy Kinolbe absele: “GAMANGtungan amangban banantongan, ganalaman a sanusun, bindo keka maranji banuddin do hanangan pudyingteji” (Bangsa Hangan 1:7).