May 29 – Ganalaman a Ranzsangan!

E anosai galam maranji amben abmele ugai! Iten asan gamlenden ganalaman a ranzsangan amben pangle a szdle. Ambendam agganad. Bar janang bute bute a ganben susuleji, aninji a d’ong amben a dangdangle” (Luk 11:52).

Kitungan asanibdaij beran tiyle a mandranji a d’ong do a baran asan. Janggardan a taniytiyan ranaptidage ate tiylangten do a bara-lingan dile pwrardanji anabmainan dete.

Hen galamtai Kitungan a baran, ayengan amandran Kitungan a baran lumle dakuneten, ranaptidage. Hen gijlai ateng bitti do ganalam maranji anablun hangleji kun ambrij, a baran batte. Do hen amdramlai bo surda kan ambrij ahangdraangan hangle kun a baran batte.

Bar Hen aimtai bo pwrba ayamling Kitungan a mandran oblingle. Kun ayamlen abaran, a tonanan amainaben abmele yireten, itente amangan tumadgijan abmele janababan adelen ambrij. Kun ayam a garberan, kun tonanan tumadgij-lingan dirneten, gamle: ‘O’n, gijja, Hen nami tiytam, Rajan araninsang-j’e do a hangnaben abmele. Dirna-lingan hanga’. Anten asan, gamle, anin a s’in abju’nle. Do kan Kitungan a boangtan, a s’in janang abj’unle ranisanan a hangte ate. Do kun a dinnan saring, Janggardan a taniytiyan susule a d’ongan abhanaben asan, ranaptidage.

Kitungan a tiyaite-a taniytiyan hangdramba do ahiman abguguba. Nami, ateng mandranji ahanglenji a taniytiyan do a ganalamji dirdirlen aninjidaman kinsatenji, do atanakud-lingan, galuteji.

Jisun ayamling janang, ateng mandranji Kitungan a suyeman adhamdramadji, do Jisun raduloge gamle a d’onganji. Anin gaamle: “E anosai galam maranji amben abmele ugai! Iten asan gamlenden ganalaman a ranzsangan amben pangle a szdle. Ambendam agganad. Bar janang bute bute a ganben susuleji, aninji a d’ong amben a dangdangle” (Luk 11:52).

Tanahimdam Kitungan a onagji, iten a ranisang-padan a hangle Kitungan amang saring hangdramba, janggardadage a taniytiyan, ranaptin orde asuyeman, ahiman a ganugu abmele hangdramba. Do awrloge amben anabsittan a hangte. Do ranptiloge Kitungan d’ongben abdainate. Janggardadaaage anabsittan batte Anin d’ongben absitate do lanankkaban saring.

Okiy Kinolbe absele: “Ette jongiong ambenja, Janggar- dadage taniytiyanji a hangben asan boiboi a-itsumlen asan, yante gamle ranukkun a taramtam abmarangben asan. amben awr taniytiyanji rapti a hangte, antabmele erba guijba” (1 Korintian 14:12).