May 28 – Banuddin do Ganalaman a kuddub Tanartum bittin!

“Kani a r’u bernan Kristun na. Anin amang lingan banuddin do ganalaman a kuddub tanartum bittin sonoson daku” (Kolosi 2:3).

Butente Kitungan a d’ong abm’oihteji aninji a d’ong Kitungan sonosodage a daku a tanartum bittin hangteji. Kitungan sattang galamte kuddub anogalanji, baran lanuman, do iteja asosoted amangan saring.

Anappai Pol gadlamlangten asosodage Kitungan a banuddin do ganalama. Anin gamte: “Ugai! Kitungan a_Ibanuddin do a ganalamge a bittin yan a jaru! Anin a bitsaranji yan a r’udamlear Anin a godanji yan 2 er sanil!” (Romi 11:33). Angante ganalaman asan argaldataben, itente aganalam amben sanaisai Kitungan d’ongben tiyte.

Nami, ateng ganalam maranji dunglenaiji (Daniel 12:4). Cumputor a ganalam ahangben abmele ateng mandranji saiteji, engdas’ingan abmele. Kun ambrij, er maridan a janggardan janang mandran a d’ong abs’idte.

Bindo Kitungan a passijanji a d’ong abdainate, janggardadage aganalam, Kitungdage do ruangdage aganalam. Bo mandran ordardage aganalamlingan daku, kan aganalamanji hangle adrabtie. Tudru ganalamanji daku kan ambrij:

1.Kitungan a ganalaman

2.Jaru do kambolan a ganalaman

3.Ambendaman aganalam

4.Janggardadage a ganalaman

5.Bo mandran, bo darakuna orde bo bernan abmele a ganalam

6.Ruangan do kinoraiyan, ordardage a janggardan a ganalam

Kuddub kan a ganalamanji, ajardinan tanurtum bittin ambrij!

Bibolan gamte: “Bindo butente saijteji kuddub Kitungan galamte” (Bangsa Hangan 28:5). Kan ruangan a ganalaman batte, bangsa anoblingan oblingle baran lumle mandranji a d’ong Kitungan anurungan, surda soban orde garber soban alumben lumteji.

Tanahimdam Kitungan a onagji, mandrengna-ling-ben ateng mandranji yirtaiji. Angante ruangan atanurtuman a bittin a hangte, kan batte amben bo bangsa-maran gamle ganalaman dete, iten anin abaran gamle, anin joldamar – butente a baran kan ordar-lingan er sumdage, aboi anin joldamar. Bibolan gamte: “do mandranji abmele’ buteja mandran a sakkin amdangben asan Anin a sanaisai addead, gamlenden itente mandran a l’ungj’e Jingan dakule, antate Anin galameten” (Jon 2:25).

Okiy Kinolbe absele: “Anin na jugan do jiruban bandate, Anin na rajanji a d’ong tabte do aninji a d’ong tabngijte; Anin na ganalam maranji a d’ong ganalaman tiyte do banuddi maranji a d’ong banuddin tiyte. Anin jaru do sosoberan abpunggete. Anin lungud lingan itente sanoso daku antate galamte, do Anin ampara tan’aran basute” (Daniel 2:21-22).