May 26 – Kristu Jisun a ganalaman a jznjzn banangsan!

“A jardin na Gamangtung-hen Kristu Jisun a ganalaman a jznjzn banangsan asan kuddub janabanji, ururdedage” (Pillipi 3:8).

Tumadgij-mar Daniel ganalaman awrle a tanakudan ayam-ling (Daniel 12:4). Adangardan ayam-lingan, mandran ganalaman ahangben asan ateng tagoran yirte. Etigoi skulan yirteji, digrin tabkule ganalaman hangle kan ambrij bigarda bigarda kinolanji, ordardage a ganalaman ahangben asan. Do kan ambrij aninji ayaman do lebun korsoteji ganalaman asan. Bindo kan a ganalaman batte mandran a d’ong ruanganban anurungan adea.

Anappai Pol idolle Kristu Jisun a ganalaman a jznjzn banangsan abmele. Kristu Jisun a ganalaman-lingan banangsan daku. kun a ganalaman batte gugudage do man’oihdam. A jardinna, U’an Kitungan do a O’n Kitungan Jisun Kristun, erahidan a mandrengnan. Itente mandran amang asui ganalaman, Kristun a ganalaman ahangben jznjzn murdadam. Iten asan gamlenden, kun aganalaman batte sattang anurungan dete ruanganban.

Iten anabsittanji daku Kristun agalamtaben? Anab-boi, Pitor gamle: “Gamang tungan do Ablu Mar Jisu Kristun a ganalaman bathe, aninji kan a ordaran a pansardin saring anablun hanglenji den” (2 Pitor 2:20). Kan ordaran a pansardin saring abluben, kun a ganalaman batte roitad abmebenten (Jisaiya 53:11).

Anab-bagu, Pitor janang gamle kun aganalaman batte awrloge asuyeman do sanabyun mandrengna abmele. “Kitungan do Gamangtu’ng-len Jisun a ganalam linganlaauyeman bar sanabyun anabatengan debente” (2 Pitor 1:2). Asuyeman do sanabyun daku Kristu-lingan. Bindo ahangben asan asurpidamnaben dete, a galamben asan, asuyeman do asanabyun batte mandrengnalen marangte awrloge.

Anab-yagi, a ranaptin batte d’onglen rabdute, mandrengnalen. Bibolan gamte: “Butente a ganugu pane’mengan do banangsan bathe g’udinglalen, Am’n a ganalamdaman bathe a Kitungdage ranaptin mandrengnan do Kitung ganangkil baran asan kuddub san‘ai Bai janabanji tiylalen” (2 Pitor 1:3). Kristun a ganalaman a dane ahangben asan a Kitungdage adarakuna-lingan aganben dete.

Aangante akinolte kan bagun a pitoron a kamb’olan, ateng anabsittanji arabangte Kristun a ganalaman ate. Tanahimdam Kitungan a onagji, barij j’e-ben batte surpiddamnaba Kitungan a d’ong agalamben awr saring awrdam. Kitungan a bernan hangba, janggardadage anargalan do dulejan batte, do jaru gamle anamdangan batte. Do Marid Janggardan amangba surpiddamnaba, etiden Anin absuibenten gugudage a bernan.

Okiy Kinolbe absele: “Bindo asuyem lingan do Gamangtung bar Ablu Mar len Jisu Kristun a ganalam lingan marang naba. Anin a d’ong nami bar tarda ayam sikkoi ja gug’u panemeng t’axan de ebe” (2 Pitor 3:18).