May 25 – GANEPARETHIN JADA PREETHI

Ephesivalun 3:19 Genena hath chadenijako Christhur premena,malam karlena jorer ven , Dever soli bharpurethi bharayena.

Dever gen manikyar genethi jadajvencha. Vu premer vundon,chodo, laambo sada malamkarler veni. Asmanema tharavun lekoghaler venitho ajji manikyar dassek genethi Dever premen sada valaker veni.

Surya sey grahavu dakal yek graha lapan Suryan dekatho sethi jada moton jhankevalenai dekavacha.  Dharthi 9 grahavuma yek graha dakalaj pan 750 karod manikyathi jadaj bharlen padricha. Kunithoi asmanemathi manikyan dekatho nankis keedir nai dekavacha.

Asmanethi vutharan aan thon kathra moto premethi prem kidocha deklatho. Vu Prabhu thamen yek yeken namethi balan prem karevalo cha. Vu Prabhu Kalvary siluvaper redo jako loyeethi thar papen dhonaken pavithar karen thonaj dhundlen ayo. Tharvadi Prabhu dekalojako yee preethin ghano ascharyavencha vu thar genethi valker veni.

1 Yohan 4:8 vachanema Yohan lakkacha Devaj prem,prema chenijako Deven malam karleni. Jagathin punadhi gheni aangaj aan jagathin thar saru srusti kidokoni jer aangaj Prabhu thon prem kidocha. Ajji thu huyokonijer aangaj thar paperan rogdokker bharosejini paaldido. Nithyathvamemaj thar saru karnujako sejini  karnakocha. Assa preethin thu thar sosethi saha sos karer veni jathra motcha.

Thar gen thamjayer cha. Vu genethi thu kai dekechiko von viswas karechi, kai kanethi samlechiko vonaj ajji thu kai savaad halmelochiko vonaj hav kechi. Lapan thu hamesha reran thar ankin dekayenijako cheejevun aradham karler veni.

Thu artha karlidojako thar Yadi baper prem hamesha reni. Vunder jayero daad dai avajana vunder prem dekavanaju racha. Lapan Christhur prem hameshathi hameshanaj rer cha. Yesejithi jada kai malamka, thu thar yadir petema pedavokonijer aangaj yee Prabhur prem thar vumper vudamelocha ajji vu preethi asmanema javasjana sada racha.

Mar premer Dever beptavo yee  preethi ma thu bharan rastho, vothij thu chalechi Vuj thona ashish karacha. Jethi thu Christhur preethithi cheti jomath. Ajji jada dyan karen pado Romavalun 8:35