May 15 – GHAN SRESHTER PAVITHRATHA

Deemo vupadesher grandh 28:9Thu thar Dev Yehovar agnar nai ann vor vathema chalastho Yehova thon vathdinoju thon Vor Pavithrer janner dakal prathista karlacha.

Juno kararer dadema masaj jaag Yisraeleval  pavithar jann kethani balamlecha. Deemo vupadesher grandh 7:6 vachanema dekatho Thu thar Dev Yehovana pavithrer jann ,thar Dev Yehovana jammiper chajako sey manikyathi jada thon taallen, thon Vor sonth janner nai bharkadmelocha.

Aaj thu sada pavithar janner nai Dev thon taalmelochkan bhulamath. Jethi thar dall puro ma pavithar jeevano banchnu kajako asan tharas ven renu. Vu Prabhu ghano prem karroch jethi thon pavithar karnu kajakonaj Vor asa.

Athra jada thon prem karmeloch jethi vu Prabhu thar saru loyeen redocha. Hanu prem kidojethij aaj thar jeevano sari pavithar  vatema chalayevasu thar hathema Pavithar  Bibilena demelocha. Thon athra prem kidoch jethi Pavithar Athmathi Abhishek karmelocha. Dever beptavo thar jeevadana jaan ann athmana bharpur pavithar karnakacha.

1 Thessalonikavalun 5:23 vachan kacha, Samadhaner Devaj thamen puro Pavithar kariye,thamar athma ,jaan, jeevada,puro apaner Prabhu Yesu Christhu avajanna ,dosh cheniju jathanethi reda.

Apaner Prabhu Yesun dekatho vor sari jeevano pavitharaj ! Hanu Pavitharethi vetho jethi vu paapen kidokoniju bancho. Vorsaruj jagen yek savaal kido Yohan 8:46, Maar mayi paap chakan thamema kun ruju karer vacha?

Vodaadema vethejako Saddukayavaal, shasthrivo,ajji Pharisayaval kunithoi Yesu bapun papema haljayer vikoni, lapan jann Vu Prabhu pavithar kan von viswas kidey. Aposthaler Paul Yesu Prabhur dharthipar  jeevaner vadi Hebrivalun 7:26 kacha vu Prabhu Yesu Pavithar vetho ,haan kidokoni, vonvu apavithar karleniju paapethi cheti ven ra.

Thar jeevanema Yesu Prabhu yekloj pavithar karevalo cha. Vu Yesu Prabhu yekloj thar hath jhallen niyather vatema chalayevalo cha(Geeder grandh 23:3 vachan kacha) vu Prabhu yekloj thar akharir dadethanu tokrinalagaju jathanethi rakadevalo.

Sathanen hajarema akarshana karer vaat cha. Vu vatema TV ma cinima dekkan kero, dusarethi bhesan vathey kar kacha, yesejithi thar dallen tokrilagaju karnakacha. Rahasyamethi karajako paapaj manikyan papema chalavacha. Yee sathaner paper hathema halajan regochikatho ajji vu Prabhur darepar thu royervacha. Jethi Thu pavithar jeevanen banchastho ajji sathan kai kareni Paralokdesh tharaj.