May 11 – Lanangkaban a Dakun a Janabanji Abmele!

“Itente ordar lingan daku, kuni a Janabanji ijja, bindo Ianangkaban a dakulen a janabanji abmele maih magadnaba” (Kolosi 3:1-2).

Bararaban, buteja anosaijan a dakun a baran alumben abmele adnoskaineji, ateng ayam abmele. Aninji saiteji bangsale surdale surdale abaranji amarangten ate. kun ambrij, amben janang jangardadage a mandrengna amarangben dete, bindo lanangkaban saring anabsittanji saiba bar bangsale adakunaben abmele ogandiba.

Bo mandra dakule aboi s’i-lingan atoltaben a gordi ahiben abmele yireten. Bo bigardadage a gordin apsuile dukkani-maran. Bagun a gordin hadab gijtale aboina akompani. Do anin kun bagun-lingan ansale adrabtiad.

Tanimna maran gamle a d’ong aboi ate bo ajar tankka, anab-bagu ate yagi ajar tankka, do garanti ateng adaman sattang ate daku. nami a dinnaji mandranji ganludteji asui ate kayatinge gamle bo ateng adaman ate boi boi bangsadam gamle.

Kun ambrij, kan ordaran er bangsan janang bangsa ambrij abmeteji. Kitungan absuilangten Lanankaban a jananbanji, sonuman kurte ordardage a jananban absuile mandranji a d’ong, itente lingan s’zd-dage. Sonuman san’zd-dage a janaban apsuite. Bindo Kitunglen Ruangdage a janaban apsuilangten. Ganijgijbenji lanankkaban adakkuben dete, kun atena boi boi bangsadam do erahidage a hangdrang!

Aso do Jakub banuhang dakuleji. Ason a sanengsengan dakule er hangdrangdage ajab-lingan itente asui ayam abmele. Bo gangan abmele, abs’zdle akarukkuadan a dane, apardigi. Bindo Jakub etileted, anin sengsengle itente lanankaban saring yirtai do itejanang alumben delenden anin oskaidam dakule ahangben asan.

Aboi enegoi papwr kanznan daku: ‘Hen ordardage a ganijmad-lingan adyirre do bo bangsa hangdrangan abmele ganijgij-hen anabs’zdai’. Ordaran aganijmadan gadlamte ordardage aganijgijan do abs’dte ate d’ongan. Amben kan ordardage a pintu-lingan agaludong do anabluben abs’zdong itente JisunKristun saring a hangle. Iten asan gamlenden Anin boi boi bangsadam, uwr lanakkaban do butente dile ayam abmele amben ampara dakute.

Tanahimdam Kitungan a onagji, mandrengnaben abmele iten amben a ogandite? Ordardage aganijmad-lingan amben dakupo orde lanankkaban a janab-lingan? saiba itente lanankkaban adakun ate, Kitungan a jananbanji.

Okiy Kinolbe absele: “Ruang lingan Aman sadle hen apsele buten okij daku? Aman sadle ordar lingan hen iteja apsele adnangtzrrai” (Sanenken 73:25).