May 02 – Lanangkaban!

“Bar nami dinna hen d’ong-ben a tiytaben a kuddub GAMANG Kitung-ben a banaihberanji bogad amben kilkillen mannele a lumlenden, etteden kani ordar lingan a kuddub jattinji saring GAMANG Kitung-ben d’ong-ben abgugute.” (Bagujuanaber 28:1).

Kan 28 a surda-lingan janibjibanji do ananganji anidolan ate gijtabe. 14 sikoija janibjiban a berna gijtabe. Kuddub anabsitta beranji daku kun batte angante mandran mananee-lingan dakute Kitungan a berna-lingan.

Anlen gijtabe pastoronji a hamdramteji kan ambrij a bernanji tabme s’ingan a sanurpidan do s’idrungbanji. Amben janang a gijte kan bernanji anabsitta abmele gadlamte, aten asan amben bangsale a ogandiben dete Kitungan anosaij ber-lingan. Bar amben Kitungan a bernan amanete.

Kan a nosaijan do mananen Kitungan amangba, kuddub bangsaloge er dukkadamlen. Kun batte ganalaman dete man’oihan anosaijanji abmele. Angante amben Kitungan a d’ong atimyimte, kan anosaij beran batte amben adakuten. Bar angante Kitungan gijte, Anin m’oihte do lanankaban dakule Kuddub ordaran saring.

Angante Josep, Kitungan a d’ong timyimle do pitun saring sagai dakudamneten, misor-lingan a d’aongan abdainale. A buhanganji do a u’anji, saile amangban yirraiji bar a mukkaban turdumleji. Misor-lingan aboi anin surda dane hanglen adnanang, bar a u’an a d’ong sagalle, Kuddub a buhanganji do a birindanji.

Daniel a d’ong gijgijba. A d’ongan babilonban anurungan dale, barondis’ing-lingan. delejanang Daniel amangba Kitungan a tanimyiman barij dakule bar anin garberlen dakuneten, kanalkalan ayamling janang orde kun desa-ingan kan ambrij abmeleji. Kitungan a d’ong atimyimlen asan, kun a desa-lingan a dane maran, angante bigarda bigarda rajanji batte anabhanan dele. Kuddub babilon saring a ganalam-maranji saring a d’ongan anabgugun dele. Ateng a tumadgij-beran anidolan dele bibol-lingan.

Tanahimdam Kitungan a onagji, bogad amben Kitungan a d’ong a timyimlenden barij j’e-ben batte, barij lanagadan batte, etiden Kitungan kuddub kanalkalben obsadte. Anin d’ongben abdainale abdibenten ajar ajar ayam. Anin d’ongben lanangkaban abditaben.

Okiy Kinolbe absele: “Bar GAMANG Kitung-ben itente itente a banaihberan mannele a lumben asan Hen nami a dinna lingan d’ong-ben baihtaben, bogad amben kilkillen a mannelenden,” (Bagujuanaber 28:13).