May 01 – Sonman!

Proverbs 15:33 sonman laga agete nomro ta ase

Apuni bi sonman pabo mon jai? Aru ekta bhal jagate ekta leader hobole apuni laga kaam te? Tinihoile apuni khan nijor ke nomro pora gherav kuribo lage. Khali nomrota pora hi apuni ke sonman anibo.

Kityabi apuni laga porivaar te ghagra hoi, ami kityaba nahoile tu itu jhagra khan ke thik kuribole nabisare ekta thik bhabna thaki kene.Manu laga bhabna ki ase itu bujibole nabisari kene, chutu kotha ke bi ami khan bisare dangor kotha kobole. Inika hi, chutu kotha pora hi dangor hoi jai aru shanti nathka hoi jai porivaar te  aru inika hi porivaar bi bhangi jai. Khali ekjon pora bi buji le aru nomro thakile, bishi jhagra khan thik hoi jabole asile aru shanti thakibole asile.

Kunuba manu khan bhabna kure ki tai khan maph mangile tai khan laga sorom ase, aru tai khan laga sonman te dagi lagibo. Aru it utu pobitro kotha pora bhabna nakure. Ahibi sabo pobitro kotha te ki koi: psalm 138:6 isor pora sai nichete thaka khan ke.matthew 18:4 itu karone, jun bi nomro kure nijor  ke ekta chutu bacha nishina tai hi dangor ase swarg laga rajyo te. Luke 14:11 tai jun hi nomro kure nijor ke tai ke uthai dibo. James 4:6 isor pora maph kure nomro khan ke.

Ekbar ekta isor jana manu kheti pora par hoi thakishe, alag alag dhan khan dangor chutu thakishe. tai dikhishe ki jowan dhan khan thik khara ase. Aru kati bole thaka dhan ke bi dikhishe, nomro hoi kene giri kene thaka tai khan laga matha nichete giri kene. Itu dhan khan bishi guti lagi kene thakile bi, tai khan ghamand kurnai aru niche hoi kene nomrota te thakishe. jitya tai itu saishe, tai laga mon khushi pora bhorta hooishe. Tai shiki bole parishe ekta lesson nomro hoi kene thakibole jitya mi khan sonman pabole laga ase.

Kityaba kunuba isor laga naukar khan atma laga uphar pai kene thake aru jitya tai khan dangor kam kuribole pare isor laga kam te, tai khan manu ke niche te sai aru ghamand pora hi bbhorta hoi jai. Itu kile koile tai khan nomrota tu isor jisu krista pora shikanai. Isor jisu krista laga ki nomrota ase? Pobitro kotha te koi: phillipines 2:8 aru manu laga roop pai kene, tai nijor ke nomrokurishe aru kotha mana laga bonishe mura laga homoi tok, krus te mora tok.

Jitya baba Jehovah pora bhabna kuri thakishe: kunke ami pothabo? Aru kun ami khan karone jabo? Ami khan laga jisu krista nomro kurishe nijor ke pura aru isor baba laga icha pura kuribole uthishe. Pobitro kotha te koi: Hebrews 10:7 titya jisu koishe, thakibi, ami ahishe. Itu kitab te likhi ken ease ami laga kotha- apuni laga icha kuribole, oh isor.

Tai nijor ke nomro kurishe aru kotha manishe, tai laga khun laga ses boond tok, ami khan karone. Isor laga bcha khan, tai laga theng te khara kuribi aru shikibi nomrota. Hodai din nomro thakibi isor aru manu laga agete.

Aji bhabna kuribole laga pobitro kotha tu hoile luke 1:48,52 kile koile tai saishe niche khan ke tai laga naukar khan bhitorte. Tai nichete te girai dishe tagot thaka khan ke tai laga rajyo pora, aru uthaishe nichete thaka khan ke