Mar 30 – JAGA JIT LAGA!

Matthew 4:1 “titya Jisu ke loi jaishe Atma pora jongol jaga te porikha lobule nimite Satan pora”.

Pobitro atma Nijor hi faisla korishe jongool jaga te jit laga aru loi jaishe Jisu ke tate. Jogol jaga hi thakishe jaga jit laga. Suku te itu prithibi laga, balumati jaga nahoilebi sunsaan jongol laga jaga mane ekla thaka ke koi ase, bishi dukh thaki kene, aru itu ke kun bi thakibole mon nai. apunipabo tate bhal mol te thaka gash aru paudha khan aru sundor phul khan jongol laga jaga te. Hoilebi apuni kitya bi ekla nahobo jongol jaga te. Isor laga mitha maujudgi, aru norom uri thaka Pobitro Atma logote, apuni pora bonabo utu jongol jaga aru phelai diya jaga ke ekta mati khushi laga. Isor pora kosom dishe, “jongol jaga aru phelai diya jaga bhal hobo tai khan karone, aru balu mati anondo koribo aru phulibo gulab phul nishina”. (Isaiah 35:1).

Apuni khan jai thakibo pare inika hi jongol jaga laga anubhav te, kilekoile apuni laga jibonsathi morishe pare. Nahoilebi ki jani apuni laga bacha khan kaam kore aru dur jagate thake aru apuni kityaba hi tai khan ke lok pai aru apuni khan laga naati khan ke sabole pai. Kun ke apuni yaad kori thakile bi, apuni khan hodai itu jani thakibo lage ki Isor Jisu ase apuni logote sob homoi te. Ekbaar apuni itu ke jani loile, apuni paar koribo pare kandi thaka laga ghati ke bi aru bonabo paribo itu ke ekta jharna.

Tinta zaroori anubhav rokhi thakishe Isor Jisu karone, jongol jaga te. Poila, Tai jitishe satan laga sob porikha khan ke, aru jit paishe itu khan uporte. Dusra, tai ekta bhal homoi thakishe aru avsar thakibole gehra milap te Baba Pormeshwar logote. Aru tisra, Tai bhorta hoishe shakti logote aru uphar khan Pobitro Atma laga.

Ekta manu thakishe jun laga saza kalkotri te dikhishe manu khan karone ekta sunsaan jaga nishina prithibi ke. Hoilebi tai koishe ki itu thakishe ekdom sundor aru bhal homoi maujudgi te Isor laga. Sunsaan jaga hi  ekta jaga ase jote apuni tagot kore apuni laga komjuri khan ke. Isor pora loi jaishe Israelites khan ke jongol jag ate challis saal nimite; aru tai khan paishe tagot ekta jongol laga bhens nishina. Utu jongol laga prarikshan modot korishe tai khan ke jitibole saat ta desh khan ke canaan laga aru jitibole ektis raja khan ke. Khuta badal laga aru khuta jui laga, yaad korai maujudgi ke Isor laga. Mahima Isor laga thakishe dhip uporte bi.

Isor pora dikhaishe anginat achurit khan ke jongol jaga te bi. Hodai Israelites khan ke bhorta korishe swargduth laga khana pora, aru pyas komaishe Pathor pora ula pani pora. Tai khan tu mahima janak laga raja te thakishe. isor laga bacha khan, apuni kitya bi napahori bo lage ki ekla thaka laga sob anubhav laga pichete tate thake bhorta ashibaad Isor laga. Israel manu khan paishe mati duth aru shehed laga paar kori kene utu sunsaan jongol jaga ke. Tai khan paishe lota bagan khan juntu tai khan kheti koranai, aru paishe ghor juntu tai khan bona nai. apuni bi pabo inika hi ashirbaad apuni laga sunsaan jaga ke paar kori kene.

Aji dhyan koribole laga pobitro kotha tu hoile Isaiah 32:15 “Atma tu nagira tok amikhan te upor pora, aru sunsaan jongol jaga bone ekta phaldaik kheti te”.