Mar 28 – KHUN ARU PANI JUNTU ULAI DHALISHE!

John 19:34 “hoilebi ekjon sena khan majete chenda korishe Tai laga kinar ke jathi logote, aru achanak khun aru pani ulaishe”.

Jinika utu sena chenda korishe kinar ke Krista laga, dusra khan chenda  koribo pare apuni laga mon ke bishi baar. Itu nahobo pare jathi; hoilebi hobo pare chenda kori diya hobdo khan. Nahoilebi tai khan chari dibo pare apuni ke; namanibo pare apuni ke; ninda koribo pare apuni ke; biya hobdo kobo pare  khilaf te apuni laga; aru phelabo pare misa apuni laga kotha ke. Hoilebi swarg sai ase ki kinika apuni rakhe nijor ke utu homoi te.

Khun juntu ulai ahisxhe isor laga kinar pora, dikhai Tai laga khemai ke juntu Tai diye tai khan ke jun khan chenda korishe aru jokhom korishe Tai ke. Pobitro kotha te koi, “Tai te ami khan pai poritran Tai laga khun dwara, khemai paap khan laga” (Ephesians 1:7).

Jitya dusra khan chenda kore apuni laga mon ke biya hobdo aru kaam khan pora; itu ase Isor laga icha juntu divya khemai dhalibo lage apuni laga mon pora. Hoilebi bishi manu khan bhal nalage itu ke. Tai khan khong uthe aru hamla kore saap nishina. Tai khan laga suku bhorta hoi khong pora. Itu prithibi hobo pare inika; hoilebi ami junkhan ke mate bodli hobole tai laga chabi te nahob lage inika kityabi.

Jitya ekta sipahi chenda korishe kinar ke Isor laga, itu khali nahoi khun pora; hoilebi pani bi ulai ahishe Tai laga gau pora. Utu pani ase nadi jiyai thaka pani laga (John 7:38-39). Morom Isor laga dhalishe ami khan laga mon te Pobitro Atma pora junke dishe ami khan ke” (Romans 5:5).

Ami khan jun paishe khemai ke paap khan laga, poritran aru divya morom khun dwara Jisu Krista laga, anugrah te barhabo lage khemaii aru divya morom manu khan ke.

Ekta seb gash ke lagi thakibo mitha phal khan, judi bi itu ke pathor mare aru bbiya kori diye. Itu ase ki jinika seb gash pora koi, “sathi, apuni marishe pathor ami ke; hoilebi ami nirnatar morom kore apuni ke; aru ami diye ami laga phal khan ekta uphar nishina”.

Ami porhe kitab te ki naam sipahi laga jun pora chenda korishe kinar ke Isor laga thakishe Longinus. Jitya olop boondh isor laga kimti khun girishe tai laga suku te, tai pura aru achanak changai paishe suku te rog hoi thaka aru dangor bikha te thaka. Tai picheteswikaar korishe tai laga paap khan ke aru paishe poritran . ami janishe ki tai pichete, tai bonishe ekta mahaan naukar Isor Jisu laga aru hekh te morishe ekta shahid hoi kene isor kaorne.

Bacha khan Isor laga, jitya apuni morom kore tai khan ke jun pora korishe anyay khilaf te apuni laga; aru kore bhal tai khan karone bodli te, apuni bone ekta dangor ashirbaad tai khan karone. Aru apuni hoi bhorta khushi pora.

Aji dhyan koribole alaga pobitro kotha tu hoile Colossians 3:13 “bhugi ke ekjon dusra jon ke, aru khemai kori kene ekjon dusra jon ke, judi kunuba ke ase shkayat  khilaf te dusra laga; judibi Krista khemai korishe apuni ke, inika apuni bi koribo lage”.