June 17 – LAKKEVAL HATH

Yohan 8:6 Vopar dosh daalena Vona paricho kathey hannu key,pan Yesu navan aangalithi jammipar lakko.

Yesu Prabhu bagey leko chenijathra Jada pusthakevo lakkamelecha. Hanu kenukatho yee Jagsari lakkathoi puro veni. Yesu Prabhuro Premer bagey, jorer bagey ajji krupar bagey Jada katho jaasthij pusthakevo hazaarema lakkarecha. Vujji aajethanu laakema kithabevo thayyar vericha. Lapan apaner Prabhu Yesu yek grandh reda, kahad Reda ajji yek geeden sada lakkokoni.

Dever vachanema Paanch grandhevun Mose lakko,meeti geeder grandhen Raj David lakko. Theen gener vumpar lakkojako Solomon cha, 14 kagadevo darshanevuthi Aposthal Pal lakko, Aposthal Yohan Yek hach khabrethi pakadan Darshaner grandhen sada lakkocha,dusar Mathai, Mark ajji Lukar hach khabarer kagadevun lakkamelecha. Yesu Prabhu vor hathethi yekki grandhen lakkokoni.  Saasi Yesu Prabhu yek grandhen thoi lakkoka?

Adhikara purvakavagi Yesu Prabhu yekki grandhen lakkokoni lapan Bibilema chaar jaagema vor hathethi lakkojen dekacha.

Voma yek Prabhuj Vor hathethi sey agnavun lakkocha. Vimochan grandh 32:16 vo palakavo Dever kamaj. Vo palakapar lakkamelejako vu Hather lakkavni Prabhuj lakkocha.

Deemo David Devalen bhandnukan keldojana Devaj yek nakshan ko. 1Dinvrutather grand 28:19 Yeseji manna haval karnaken Prabhur hathaj mar vumpar athanu yee kamen ku karnuko vo sejini malam kido kan Solomonen David ko. Theenmo Daniel 5:25 vachanema Beltheshajar raj Babulonema yek motas thevar kidojana sainikavun balathaanu Yerushalemer Devalema chajako soner tokanevun mangan vomaa daaru pidojethi Devaj Vor hathethi yek godapar MENE MENE TEKEL VUPHARSIN kan lakkojen dekacha.

Chaarmo Yohan 8:6 vachanema Vyabhicharmena karthi pakadagijako yek beeren Prabhur kan laayejana vunder aaten saamlanaju vor hather aanglithi jammipar lakkokan dekacha. Vu Kai viyya kan dekatho Dever preman vu papen maap karevalo kan riyya. Lapan apanen malam cheni kanna paralokema jamatho Prabhun puchatho vu Premethi samjavacha. Vuj hathethi jeeva grandhema Dev hanu lakkamelocha Darshaner grandh 21:27 Theeteran,asayyaran, labbarina chalavajako kunsi vormayi jayeni,Gorlir Pillar Jeever grandhema lakkan chajakoj voma javaacha.

Aji Jada dyan karen pado Luka 10:20 Athoi bhuthadiyu thamena vath manachakan tham Khushi payeniju, thamar naam swargema lakkan chajethi Khushi karokan ko.