Jun 24 – Edanan ayam-lingan banabyen!

“A edanaben ayaman do a tongben ayaman Anin gabrite” (Hanangber 3:4).

Angante man’oihan batte amben a tongte, ateng mandranji amben ampara m’oihtenji. Bindo angante amben a edaten, amben tangsoi dakutaben. Ajar ajar man’oihben gadlamte, amben asoidebenten angante amben danukkalingan dakutaaben.

Dile mandranji danukkan batte kanalkal-lingan dakuteji. Marid Bibol-lingan, bo kambolan daku ‘Edana’. Tumadgijmar Jirimiya edalen gamle: “Bogad b’ob-hen ganingdan do mad-hen dungdamdage a maddan dakulenden” (Jirimiya 9:1). Kuddub edananji daku ‘Jirimiya a Edana a kamb’ol-lingan’.

Dangarda ayam-lingan janang, ranaptin batte tanunjengan dete, agamangtenji adnang aninji edatenji do dukkadage deteji kan ambrij, do Kitungan amangba edatenji, aninji saile adraptieji.

Papwr Anosaij-lingan, anlen kinoltaabe sindri bostan dakuleji anangante kantaran yiraiten, orde asangem-maranji anabkalkalan ayamling. Sindrin abostan bo erab-dage ahamdran dakule. Aninji kan ambrij bigarda samananji daakule, anamlen, lagaddamlen Kitungan atimangba do edalen gamleji: ‘Kitung, kanalkal-lenji obsada, Kitungan rumangbaran lumte manglenlen do kuddub sagaite’.

Juda-hanangna maranji anamtenji d’andam er galabe tagaldan saring aganyungten sikoija edalen do gudalen garbertenji. Do agarberanji Kitungan amdangte, a kanalkalanji bandate rumangbaran lumle, do anablun tiyte.

Tumadgij-mar Joel ayengan amandranji a d’ong panangan dele a d’onganji abmele a edanaben asan gadlammetenji. Anin gamle: “Danggardi juarboijan a danggarda-taban apsele, okkakaban a dia lingan jijilen a edatenan ambrij amben edanaba” (Joel 1:8). Anin janang kan ambrij gamle: “E buyanji, dia-ben okkakaban jile edanaba; e kanub aranggan a gangkil maranji, amben edanaba; e Kitung-hen a gangkil maranji, amben yeraiba, okkakaban jijilen tampagal dakunaba, iten asan gamlenden Kitung-ben a s’ingan saring gale-jab kanuban do ganaga kanuban kanadaban dele” (Joel 1:13). Kitungan ahim-ling, mandranji a d’ong baile anamnaben do agarbernaben abmele.

Tanahimdam Kitungan a onagji, Kitungan amaben ampara dakute man’oihben ayam do danukkaben ayam janang, radud’ongan do er samangan ayam janang, enirdikan do edanan ayam janang, do Anin na sttaang maih banabyen tiyte edana ayam-lingan.

Okiy Kinolbe absele: “Dele janang GAMANGtungan gamte, Amben a barij j’en batte, do anamnan do edanan gudanan batte, mangba-Hen nami daiyarre yeraiba.” (Joel 2:12).