Jun 14 – Ahram thakaan te!

Isaiah 40:29 tai diye shakti komjur khan ke, aru jun khan iku tagot nai tai barhai tai khan laga tagot ke”.

Thakavat mon laga itu hi sobse dangor hatyar ase satan laga. Apuni laga povitrota tu kiman bi uncha thakile bi, satan mon te thakavat ani hi diye, aru nirasha diye aru bishi kisim laga bhabna monte ahibole diye.

Ekbaar prohet Elijah inika hi thakaan te thakishe. Tai dangor kaam khan kori thakile bi isor karone tai laga hosa mon pora, tai bishi dukh khan laga samna kuribole lagishe. Rani jezebel, tai ke morai dibo koi kene bi janai she. Juntu homoi tai utu dhamki ke paishe, tai mon bhari hoi kene thaki jaishe. Tai sukha mati te jaishe aru prathana kurishe isor ke ki tai moribo koi kene aru koishe: “itu bishi ase! Itya isor, ami laga jibon ke lobi, kilekoile ami iku bhal nai ami laga baba khan pora!” 1 kings 19:4. Hoilebi isor pora taike chari diyanai utu thakaan laga homoi  te. Tai Elijah ke ahram dishe aru tagot dishe.

Isor pora pothaishe tai laga duth khan ke uthabole atma Elijah laga aru tai ke akha dibole. Duth pora elija ke chuishe aru koishe uthi kene khabole. Titya tai uthishe aru khaishe aru bi ghumaishe. Hoilebi isor pora tai ke khan khana khai kene ghumabole nimite diyanai. Titya aru isor laga duth wapas ahishe dubara, aru taike chui kene koishe, “ uthibi aru khabi, kilekoile itu safar tu apuni karone dcangor ase”. 1 kings 19:7.

Jinika Elijah ke duth khan pora utu din te jagai dishe, isor bi apuni ke uthai ase aji, apuni ke thakan pora hillai dibole. Alag kuri dibi apuni laga sob hari jaa khan lagaa bhabna ke aru nirasha khan ke ji khan pora apuni ke prabhav kori ase, aru uthibi isor laga kaam karone.

Shiloni khan kitya bi pahar khan ke bhabna nakure hoilebi tai khan laga  pankha ke phelai kene uncha uri kene hi jai thake. Apuni khan bi shiloni khan nishina uncha uribo lage aru chamki bo lage isor nimite. Apuni laga suku khan hodai din pahar khan ke jani thakibo lage.

Itu rasta laga safar tu bishi door ase, juntu apuni dhakabo pare isor laga shakti pora hi. Atma khan angina ase aru kheti khan bi bishi ase kuribole. Isor laga bacah khan, uthibi apuni laga mon laga thakaan pora. Utu isor jun pora Elijah ke ashirbaad dishe, tai pora hi loi jabo apuni laga dukh aru thakaan khan bi aru apuni ke ahram dibo.

Aji bhabna kuribole laga pobitro kotha tu hoile Isaiah 40:31 hoilebi jun khan rokhe isor ke tai khan nijor laga tagot ke notun kuribo; tai khan shiloni khan nishina uncha pankha phelabo, tai khan polabo hoilebi na thaki bo, tai khan berabo hoilebi behosh nahobo.