Jun 07 – JATHAN KAREVALO

Yuda 1:24 Padeniju jathan karevalon, voro mahimar aanganema anandethi thamen bana doshiyur nai hubrakadena jorevalo

Yee sethi mot bachan cha. Yena thu viswas karastho vu Yesu Christhu thona takari na lagaju jathan karacha. Ajji kenukatho thar jeevaner akharima vathoi ghano anandethi thamen bana doshiyur nai hubrakadena jorevalo cha.

Yer dakalaj David Geeder grandh 23:6 vachanema Mar jeevaner Dado sey bhalayina, krupaj Mar laar aavacha. Ma Yehovar gharema hamesha banchuchu kan ko.

Jada bhakthidhar vunder jeevaner anthema,’ Manna Dever soja dikarecha’ kanan, asmanethi ghorevun rathavoj vutharan manna lejayevasu aariju cha kana Ajji thodsek yidek Yesu bapu ma thar hathema Mar Athmana haval karrochu kana kevu Karacha. Vunder antham kajako Ghano samadhanethi racha.

Dever vath Geeder grandh 37:37 Nirdoshina dekes, saspanethi chajen dekatho ra, raji karevaler valad thamman racha.  Yeshaya 57:2 vunder vachanepar sojathanu vishranthi lelerecha, vunder Vatema sudho chalan jarecha, vo sey araamema paalibhaga vegecha kan kacha.

DL Moody moto sevak Hannu ko,’ dharthi laar jaricha, asman vugadricha, Yeej ma jeethojako, Yeej Mar pattabhishekmer dado’ yee vathe kethanu akharima vor anki meechan jaan chodo kan dekacha.

Lapan papi sada vunder jeevanema araam cheniju, shanthin gamalen marjavu karacha. Vunder jaan javu karajanan, yidek Mar mother akharir dadema manna mother bhuth dikaricha, kesakkenijathra mando bhuther athmavo Mar taangen jhallen vu angarer khayema khenchlen jaricha, manna banchado kan barkavu karacha.

Thu kanna vatho pavithrethin araj kartho banchechiko janna vu Prabhu avajana reda thu marajana reda, kunas jhaldin avathoi dheerethi yedurkunlechi.

Thodsek manikya, vu Prabhu ayer mundag ma thayar ven renu katho manna 6 meena chavunu kassen katho Mar katmalema chajako sey samasyavun sammor karnu jethi kan kevu Karacha. Asso manikya kathra jada banchen Dado badavathoi kathra haptha mothethi bhar kadathoi vu Prabhu avajen thayar veni. Vunder jaan javu karathoi vunder dall mathram kannai yee loker asaparaj mellen banchu karacha.

Ajji jada dhyan Karen pado 2 Timothy 1 :12 Vorvas yee bhavetini parochu, jethi ma laaz karuni, kasen katho Ma viswas kidojako Dev kunko manna hacho malam, vor dai ma haval kidojena vo dadethanu jathan karena jorevalo cha kan ghatto nammuchu kan kenu.