Jun 02 – Kitungan a Bernan batte Banabyen!

“Satid samoih-hen ayam lingan kanin na banabye-hen; anosaai-Nam d’ong-hen abadlzngtih” (Sanenken 119:50).

Kitungan a bernan batte bo surda banabyen hangtabe. A bernan er-disamdage a suyeman Kitungan d’onglen atiyaitenan ate. Raja Daudo gamle Kitungan a bernan batte mandrengna hangle.

Kitungan Israelanji amangban gijgijle, barij danukkan batte unji soa mihnum saring ateng misor lingan a dakulenanji ate. Do Anin sibdaiberlen amangbanji, gamle: “Bar d’ong-ben Misor a kanal kalan saring rabraban rabrable Kananiyanji, Ittinji, Emoranji, Prij-inji, Ibbinji, do Jibusanji a desaban manan, ardub adangda tarunggal desaban urungte, gamle Hen gab-rij’elenai” (Hanagod 3:17).

Kan ambrij Anin jzbjzble, angante kuddubanji Kinaniban arungan deleji barij a danukkanji saagaile. Kun asurdaa suyeman asan aninji m’oihdaleji. Amben janang butente butente danukka-lingan dakuji a d’onganji babyebaji, engale Kitungan sayamle. Bibolan gamte: “Ayengan a mandra banagge maranji a d’ong sintate, anin man’oihdam; anin a kanalkal ayam lingan Gamangtungan anin a d’ong rabrabte” (Sanenken 41:1).

Amben agalamtepo yangam danukkan mandran amandrengn abs’ite, ateng enegoinan ate amben agalamte. Bibolan gamte: “Mandran a j’e lingan kanuddin anin a d’ong ablaginte, bindo bangsaberan anin a d’ong abm’oihte” (Bangsa Hangan 12:25).

Angante amben akinolte Kitungan abernan barokij barokij, j’e-ben babyete, do danukkaben abkaridate. Dile ayam kinolba, kuddub danukaben sagaite do man’oihan barijloge ahangte. Daudo gamle: “Satid samoih-hen ayam lingan kanin na banabye-hen; anosaai-Nam d’ong-hen abadlzngtih” (Sanenken 119:50).

Bakurdi gonta dingtaben kuddub bibolan atabkudben abmele. Aten asan, bogad Amben bo gonta abmele a kinollenden, pedde amben tabkudle arabtite bakurdi-dinna-lingan. orde bokurdi dinna, bogad amben a kinollenden bagu-gonta dile dinna-lingan.

Amben bo tagor bibolan a kinol asusulenden, monaben babyete, babyele bartabmete janggardadage a amndrengna.

Anappai Pol idolle: “Iten asan gamlenden aparamangtan dajing bernan anidan dele, dijte – bernan anion a hanangan asan anidan dele, ‘yante ‘- gamle anidolberan a uywb-sanayen do banabyen batte anien danerderan rapti hangtabe” (Romi 15:4). Tanahimdam Kitungan a onagji, barij bibolan kinolle atiyj’e-naben dete. kan batte amben surda banabyen ahangte.

Okiy Kinolbe absele: “Berna-Nam j’eng-hen apsele lippan, do tangor-hen apsele paniradan” (Sanenken 119:105).