July 12 – ATHMATHI JOR PAYERO

Luka 4:14 Pacha Yesu Athmar jorethi Galilayana hoto go, Vor khabar agalbagal sari pheli.

Pavithar Athmar jor bharpurethi apaner Prabhu Yesupar  vethi.  Jethij Luka 4:18 Prabhur Athma Mapar cha, gareeben ach khabar karena Manna abhishek kidocha Kan vanchacha.

A Abbethanu Prabhu yeej Pavithar Athmathi sey khabarema jayam palidocha jethi Vor khabar agalbagal sari phelgi Kan dekacha.

Aaj vuj Pavithar Athmar jor thoni denu kelerocha. Yeej Athmar thakathan jorethi thu jayam payechi. Jethij Aposthaler Kam 1:8 pan Pavithar Athma thamapar avajana tham jor palocho Kan ko. Luka 24:49 vachanema Mar Bap Manna dinojako joren vumparethi duchu Kan kerocha.

Sey chelavo vuncher gharema Pavithar Athmathi jor palenu Kan yekkaj jaag golave Kan dekacha. Anasakkethi  vunchethi Pavithar Athma vaaler nai seri vumpar aathanu vu Athma dinojako jorethi bharage.  Jannathanu Yudulethi chamkan ghusgethejako kanna yee Pavithar Athmar jor palide jethi Abba bhar athanu dhak cheniju vathe kide.

Voma Pethru dhairyavagi hubaran jorethi- Yisraelervalema vasrojako manikyavo, tham niyathedhar Yesu Prabhun siluva ghalan marnake lapan Dev Voro mothemathi vatado Kajako yee khabaren hammaj gavair nai cha Kan bodh kido. Katho Pavithar Athmar jorethin thakathethi Athma dinojako dhaiyrathij athra moto gavai devaler nai sey chelavo dhak cheniju hubarecha Kan dekacha.

Delila Samsonen thar jor Katha cha Kan puchitho Mar mather lattama cha Kan ko. Vu latta kanna kaatnakeko Janna vor jor seji dagargi. Vuj Samson Delila puchijana Mar jor Pavithar Athmama cha Kan kovatho Vu Delila kunsi Haan karthikoni kaiko.

Saasi kenukatho Samsonen Pavithar Athmamaj jor palido lapan vor mather lattama cheni. Yee jor Vor pavithar jeevano banchacha Kan Devaj denako. Yee jor vona chodan dagargi Kassen katho vu Pavithar Athamar vath manokoni.

Mar premer Dever beptavo tham Pavithar Athma naraju kaikarer veni jethi Aposthal Paul Philippivalun 4:13 vachanema koju Manna jor Devalethi sejini karsakkuchu Kan apanen malam karacha.

Ajji jada dhyan karen pado 2 Timothy 1:7 Dev apanena dhaker Athmana deniju, joreran premeran kalaler  gener Athmanaj demelocha.