July 06 – ATHMATHI VARU VERO

2 Timothy 1:7 Prabhu apanen dhak padero athman dinokonthi lapan joreran premeran hacho bhejethi rero Athmaj demelocha.

Dhak padero athman sathanero athma Kan kacha. Jethij jada admivo andhrema javnukathoi, margejena deknukathoi, ajji Mar bhavishyath kai vachko Kan dhak padu karacha.

Jangalema sinkos dusar jaanvarena Maaran khavnu kelatho vu agediya janglema hubaran garjaju barkavacha. Vu aaten samlanaj vu sari junglema chajako jaanvarevo dhak padan jathanethi ghusjan vasarejako jagevumathi dhasan jaan lasten vuj sinkoser guhar mundekan hathajathanu vu sinkoser mundema chiraan jaan kaldevu karacha.

Hannuj sathan yek admin dhak padathanu swadheen karlacha. Ajjek vathema kenukatho thona saath nandir paanin pirathanu saath gaamen dhak padan dhasaju karan tharema rogdokkethi padjavaju karnakacha. Lapan Athma ven chajako apaner Dev prem karevalo cha.Yeshaya 10:27 vachaner prakar yee dhak padayer athmar kaadimanethi chodayevalo Athmar abhishekamethij vacha Kan vanchacha. Zakaria 4:6 vachanema Phojer adhipathi Prabhu yee thar jorethi reda thakathethi Reda venipan Mar Athmathij ver Kam cha Kan kerocha. Sey thara sathanero kadimanevun thodero vu Pavithar Athmar abhishekamaj. Vuj dhak padero athman cheti karnakacha. Dever joraj apanerema vassan,anander thelethi abhishekam karacha. Yee anander thel apaner jeevadama dharsan mayima chajako ghaven sejini varu karnakacha.

Romavalun 8:11 vachan kacha Prabhu Yesuna mothemathi vatadojakoner Athma thamar mayi vasrovatho, vuj Athmathi mother  vadir thamar jeevadani jeevadacha. Kanna thu Pavithar Athmar sannidhima bhesechiko Jana Athmathi bharan Deven stuthi karnu. Haal vejavajako thar jeevadana navvo jeevanen dacha. Thar rogdokkethi varu vejayechi.

Juno Kararer dadema Mosey Dever Derama  12 gothevuthi  12 sukharijako lakadivo laaye vundema Aharoner lakadi sada Melo. Pacher dad parabhathi vu Sakshi Derama jaan lakadivun paricho kidetho Levivaler gothero Aharoner yajaker lakadi phul laagan paakrijako badamer phal laagijen ditte. Yee lakadi Dever beptar jeevadan dekalacha. Mar Premevalavo thar jeevadama masaj thara katmalema chaju bhagavo reja. Lapan kanna thu Prabhur sannidhima avajana Pavithar Athmathi bharavajana thona navvo jeevano malacha ajji thu bharpur phal devaler nai rejachi.

Aji jada dhyan karen pado  Aposthaler Kam 10:38 Nazarether Yesuna Dev Pavithar Athmathin, jorethin abhishek kido, Dev vorsath rajethi vu Balayi kartho, bhuthero jorema halajarejena vaaru  kartho phartho ra.