Jul 27 – Butente Hangte Kitungan a Taanimyiman!

“Tedne bo onggersijan daaku, do anin a monloi jaba-sar rutipun bar bagu sanna ayonji daku” (Jon 6:9).

Kan a berna-ling, tedne bo onggersijan daku. angante pasijan abmele danesaman adead, bo berna bagsale – anin Kitungan a tanimyiman batte barij dele do anin tiyeten itente manangan dakule Kitungan abmele.

Jaru-anogalan adakulen asan Kitungan abmele, anin kun amanengba yiraiten Kitungan a bernan amdangben. Ayangan arikka-sin batte adnapaiyad bindo monloi jaba-sar rutipun bar bagu sanna ayonji batte appaile. Anin dolaidale Kitungan a bernan amdangben, anin adnogandiad d’ongdage adulaijd.

Yagi dinna sikoija bo ruamandage aberna kun rutipun do ayon iteja adead. Ungdrudan batte ganaganji so’ote. Bindo kan a rutipun do ayon iteja adead. Kan aboi ruamangdaman abernan rutipun do ayon hanangna-maranji kun pasijjan a d’ong agarlenji. Aninji adnogandeadji garoidage pasijajan saring agarben gamle. Aninji janang adnogandeadji pasijjan agagan abmele.

Pasijan man’oihan batte tiyle, engale hangna-maranji garleji, Kitungan abmele. Bogad anin adtietenjaden, anin janang adgijebadih monloi ajar mandranji ajumtenji ate. Nami, jumle do barij dele, monloi ajar amandranji a d’ong tiyjumben abmele anintiyle do hangle Kitungan ataanimyiman. Kitungan a d’ong a tiyte batte man’oihben hadab dete!

Asarsol-lingan bo mandran hanagodan ayirre danukka batte ate bernan dakule. Anin dulaijdale do bo s’i-sattang agaben hangle. Anin abdiben susule, bindo adhangad. Aninji bo botol ambrij d’an hangle. Kun bottol-lingan d’an adakuad, gamle bogad aman ateng d’an sanaisai dakulamanden, handrama d’an bottol-lingan, motoran abhanaben asan, do etiden aman ateng d’an hangte do lulunan. Kun bernan anin mannele do lumle kun ambrij, ateng d’an hangle ga’angale luluneten. Ogandiba, bogad anin admanietenden anin agaben do alulunaben adhange pedde badih.

Nami a dinna abernan, itente pasijan amang dakule. Bindo angante Jisun a sinba yiraiten, ajar ajar amandranji abmele atengle do barijloge jumleji. Tanahimdam Kitungan a onagji, Kitungan a d’ong tiyba barij itsuman batte. Amben janang ahangte atanimyiman do awrloge anabsittan adete.

Okiy Kinolbe absele: “Bindo bangsa baran a lumtenan abmele tungherderdage addebe, iten asan gamlenden anlen mananggan asan lingkij ongkijge addelabenden, sakkai ayam lingan anlen gadtabe” (Galatians 6:9).