Jul 25 – Butente Handrangdage!

“Purban aman apsele anin er kuijge dakule, bindo nami anin aman bar hen apsele handrangdage daku” (Pilemon 1:11).

Ordardage pintu mandrengna abhananaben hangdrangdageted. Kan ate boi boi kalkaldam pintun aboantan ambrij a mengnaben, kan ambrij amandrengna d’ongben kznoraiban urungte. Butente adnayar-j’ene pintun saring, amandrengnan er sanabyun dakute. Tanimyimdam Kitungan a onanji, angante amben Kitungan Jisu Kristun a d’ong ajate mandrengna-ling-ben, etiden amben aboi hangdrangdage amandran delaben ambendaman abmele, birindaben, Kitungan do erahid-mandrengna saring.

Anlen bibol-lingan kznoltabe bo boantan abmele Onesimos gamle. Anin Pilemon a s’inglingan boanta-mar dakule do abumung a gamangan saaring dunglen yireten, ergadlamlabe. Kan ambrij bernan dakule pwrba-ayam-ling, butente yiresidte, pandradan do ateng baran batte anabasudan dete.

Onesimos butente Pilemon amang saring sagai yirreten, Rom desaban, kun ayam-ling Pol barondi-sing-lingan dakule. Kitungan a suyeman batte, do Pol baran batte, Onesimos hangle anablun. Gijba hangam anin banadan dele angante Kristu-lingan yiraiten. Butente er handramdage dakule a pwrban ayamling, anin nami Kitungan amangba do anappai Pol amangba hangdrangdage dele. Engale Kristu birindalingan mailen, anin janangan aboi Kitungan a onan gamle ganudingan dele. Angante Pol idolle anin abmele, anin gamle: “On-Hen Onesimos, Tanolbad lingan a dakulaian adnang u’an delih” (Pilemon 1:10).

Anappai Pol arasuda-lingan dakuleja, Onesimos amandrengna-lingan Kristun adhange sikoija, anin gudingle a ondaman ambrij (Galatianji 4:19). Agajanangden amben pintu-mar orde ermarid maran ambrij anurang detaben Kitungan amangba, agajapo bangsale aogandile kun abmele, U’an ambrij? Aamben agarberle po Kitungan amangban ayirben asan? Amben aitsumtepo aninji bo bangsa maran-adeben asan.

Angante bo mandran Kristu-lingan yirtai, anin tabme ganadilan batte banandan dete, do kuddub papwran ate sindte. Er-handrangdage amandran bo hangdrandage dele. Papwr mandrengna banadan dele do anin tabme dele, engale sindrungan aadnang d’an saring drakyadan dele kanan-lingan. Do kunina ate anappai Pol sakki tiyle Onesimos abmele.

Tanahimdam Kitungan a onagji, aimba yangam Kitungan d’ongben timyimte. Anin d’ongben bandale – apwrba ayam pitu-boanta-linga dakulen do ordardage, bigardanji abmele hangdrangdage dakulam. Do angante aman handrangdage detam, ajardinan Kitungan d’ong-nam abdainate do awrloge absittabenten.

Okiy Kinolbe absele: “A jardin na banuddi maran anindaman apsele labamdage daku. Bindo Kitungan apsele mandran rapti labamdage dete po?” (Ayob 22:2).