Jul 23 – Piladelpia!

“Bar Piladelpia tanukkun a pisirdian amangban idola…” (Anabpungge 3:7).

Nami ayam-ling sonuman a si-lingan daku kan ordaran, Anasangan do anasanggeman mandranji batte asan. Ateng bernanji amdangtabe kan ambrij anabkalkalan.

Anabasudan mandran a d’ong, bo mandran a d’ong abs’idben. Desa-lingan sananbyun agasa, engale saanutenji didargamle.

Kan ate ganaroijan aambrij abernan bo surda desanji batte kan baagu desanji sanabyun ahangben asan arberan dete. ateng desanji batte ordar-lingan, bagadden batte. Nami a dinna-linganji ordaran sanid-lingan daku. Bo dinnasoi sanabyun batte dakute, ersanun batte bo bigarda.

Desan batte, apwrban ayamlen, sanumaranji saattang sanu-lenji tiydamlen. Nami ate er sanumaranji a d’ong-janan kadhidtaaji. Aninji janang tanuab maranjina. kun batte barij ordaran ganalun dete, kan ambrij, Ordar sanidban yireten bayale.

Ateng mandranji a d’ong kanabhidan dete kan ambrij. Anabmaina maranji man’oihdam – tansoij orde birindalengan (Ebri 2:11).

Orde desa-lingan. itente asanabyun Kitungan amang sring yirtai. Aninna sanabyun rajan. Do anabmaina maranji a d’ong Kitungan a oananji gamle ganaman dete (Mattiu 12:50).

Kitungan Jisun ordarban yiraiten mandran do Kitungan batte sanabyun atiyben. Angante Anin arakadang-lingan tanangaan dele, Anin a U’an Kitungan amangban.

Surpiddamlen gameten, do pintu maranji abmele Anindaman tiydamlen, mandran do Kitungan baatte abmainaben. Anin a mihaman batte abaldungle itente anasanggeman dakule.

Kitungan do mandran batte do abmainale, A itsuman dakule ruangan do ordar sanabyun batte abmainaben, do tanimyiman atanardun apaiben. Amben janang anabmaina mardeben dete.

Iten asan gamlenden, itente gittate, kun abmele- er ogandilabe itente jaggittae. Itente Kitungan bamainale antate abansadong. Baraben batte bo bigarda birindanji janang sanubyun do banangsa ahangben dete. dile ayam sanabyun abmeben dete. Tanahimdam Kitungan a onagji, ambendaman surpiddamlen bo hangdradage adeben dete.

Okiy Kinolbe absele: “Gijba, Kitungan a mandranji abo maina lingan megranrukku a basutabenate yan a bangsa do yan alsh man’oihan!” (Sanenken 133:1).