Jul 08 – Butente Gijgijte!

“Riang ontidanji gijba, aninji abbwdeji, orde aggadeji, orde gulumising lingan attartumeji, bar ruang U’a-ben aninji a d’ong rujumte. Amben aninji saring jznjzn murda ijja po?” (Mattiu 6:26).

Ordaran danukan batte barij daku, engale ganungan d’an batte barij dakute. Ateng danukkanji daku, itjaja adakuleja danukkan aboi abs’idlangten, jzjznalenji batte, anabbiyo abmele, bigardanji abmele orde banantongan batte kudinanji yirtai. Bogad amben kan kudduban akaridalenden, amben Jisu Kristun a hanangan amdangben dete. Do Anin aboi bangsa ahanangan batte agijgijben dete.

Adamdam ontidanji agijgijben dete riang-lingan. aninji adgadaji orde adgueji, orde adrukueji. Ruangan a Kitungan rujumte a d’onganji. Gijnete tarbanji gudang-lingan. a d’onganji anabgaga orde adnadjuman adea, bindo Solomon bo langaloge arobjongle, nami bogad Kitungan sindrin gudangan ate absuileden, Anin d’ongben sindrin adtiyben po? Ateng asan a kudidongne.

Angante amben dagahingan baruban ayirte, bo bangsa ganijtan gijtate yaryarmanengban. Aninji iteja kudinna addakue. Gijgijba kun kudduban ne’ebanji do barij aranji. Aninji gadlamlangtenji man’oihan-lingan adakunaben do er kudi-ling-ben adakunaben.

Angante amben amelgijte bo drakuna, bangsa bangsa drakunanji agijte do barij banangsa jananbanji gijtate. Kun barij banangsanji batte j’eben man’oihan batte barij dete. kuddub danukkabenji sagaite do amben Kitungan aganugu batte barij adete.

Bo dinna bo dirna maran yireten baru batte ruble taruban batte sardiyungban, bo ganalam asan aniji yireji. Abumungdage, barij taaruban batte ruble dakule. Anin kun ambrij ayam-lingan dunglen adrabtiad, anin susule Kitungan a d’ong abguguben do asenkendraben, gamle: ‘kun barun alangkanban saring ruangan daku. er danisaam dage tuituijanji daku anabtaran batte abpuangle. Kitungan itente Anin adhimle tuituijanji, sedalen do gudinling. Do Anin d’ong dongrabtih do ablutih.” Do Kitungan rumaang barn lumle bo anasuitagonran abmele appaile kuna mengban, engale bo baran alumten ambrij, do kun arungman baran batte, kun amandran anablun hangle kun amaneng saring.

Tanahimdam Kitungan a onagji, itedeleja nami akanalkalanji kudinnan, daanukkan, banagigodan Kitungan amangba gijgijba, Anin ruangan-lingan agarobgob-lingan agobgob daku. Do Anin ajardinna ablutaben, sanaisaiben barijloge tiyte do sanabyun tiytaben.

Okiy Kinolbe absele: “Mandran a j’e lingan kanuddin anin a d’ong ablaginte, bindo bangsaberan anin a d’ong abm’oihte” (Bangsa Hanang 12:25).