Jan 10 – Mananin Batte Kitungan M’oihten!

“Kanuban saring, sakkai do rojol lanuman GAMANGtungan karraloge jate” (Bangsa Hanang 21:3).

Angante aninji bibolan akuteji itente rabangteji antate kznolteji. Bo bernan daku ayengan amandran amndrengna lingan Kitungan a itsuman saile. Amadan bondole, bibolan akudle itente rabangle antate anin kznolle. Anin rabangle Juda doidamneten gamle. Aten saring okij kun mandran akudle gijeten.

Do anin rabangle kan ambrij: “Yira do kan ambrij luma gamle”. Okij anin kanina ambrij lumle do bibolan akudle barjanang rabangle kan ambrij: “amang itente lumte omeng luma gamle”. Kan ate aboi mandrandaman anogandi ayengan amandranji Kitungan aitsuman saiteji. Kikadage anogande batte. Kitungan a berna kinolba barij j’en batte, do barij monna do tiydamna batte.

Eteden Kitungan d’ongben olangte bangsale. Do mandrengnalingben a lippan ahangte. Gamangtungan a d’ong satta bantongba, bar barij j’e-benji batte. Anin a d’ong janardi lingan gankilba. Anab-yagi lingan, amben Kitungan a d’ong gankilba banantongan batte (1 Samuel 15:9).

Banantongan batte Gamangtungan a d’ong gankilba; tanakaran batte Anin amangban erdikanaba. Buteja mandra bagu gamangan. Iten asan gamlenden bo bzgarda mandran a d’ong anin timyimte. Ijjaden anin bo mandran a d’ong ganyimte, do bagarda mandran a d’ong puyingte. Amben Kitungan do lebun rapti aggangkile. Dile dinna amben pedde agijle torchon anbta’ar abmele. Kunilingan, kun atanaran batte kuddub lanumaudan sagaite. Iten detenben kun mandran etigoi lumud-lingan yiretenden.

Bogad kun torchon abpagetenden? Anin pedde kahidtaben ja’adja duletenden kun lumudlingan. Lippan dakuleden agalamben aberan? Do j’engan adgalue do tagorben saring agaludong. Ateng ayam, lanumudan yeryermengba daku do anlen karahidan sanle janang yirtabe. Pwrba ayamling Lippan dakulenden uyub mandran dakule (1 Samuel 15:19,22).

Mandrengna atagoran apsele Kitungan a bernan na Lippan. Anagajadan saring sonuman ateng bisadam. Bindo angante mangbaben Kitungan a berna dakute, aboi ataljingben a lippan ambrij, amben galamle araptite sonuman d’ongben kurte gamele!

Lippan a tanaran batte, kun batte amben galamle araptite iten ambrij asangem-tagoran, iten ambrij alumudan do iten ambrij atagoran kan ate gamle. Kan ambrij saring, amben dunglen sonuman saring do man’oihan batte ruangan atagorba yirben dete. Kitungan, butente lippan tiyaiten. Kan batte galamtabe absuigodan do hadab godan gamle. Anin aitsuman ambrij tagorlangten.

Tanahimdam Kitungan a onagji, Tagorben agaja adside. Kitungan a bernan, atagorlingan d’ongben abtagorte. Ateng mandranji bibolan a kznolteji adnang.

Okiy Kinolbe absele: “Banaih-Namji a god lingan d’ong-hen abhana-ih, iten asan gamlenden kuni lingan hen boiboi m’oihtih” (Sanenken 119:35).