Jan 09 – Tanimyimboi-hen!

“E tanimyimboi-hen, aman j’e-hen jumbwrte” (Solomon a Kanen 4:7-9).

Dile dinna amben pedde agijle torchon anbta’ar abmele. Kunilingan, kun atanaran batte kuddub lanumaudan sagaite. Iten detenben kun mandran etigoi lumud-lingan yiretenden, bogad kun torchon abpagetenden? Anin pedde kahidtaben ja’adja duletenden kun lumudlingan. Lippan dakuleden agalamben aberan?

Do j’engan adgalue do tagorben saring agaludong. Ateng ayam, lanumudan yeryermengba daku do anlen karahidan sanle janang yirtabe. Pwrba ayamling Lippan dakulenden uyub mandran dakule. Mandrengna atagoran apsele Kitungan a bernan na Lippan. Anagajadan saring sonuman ateng bisadam.

Bindo angante mangbaben Kitungan a berna dakute, aboi ataljingben a lippan ambrij, amben galamle araptite sonuman d’ongben kurte gamele. Lippan a tanaran batte, kun batte amben galamle araptite iten ambrij asangem-tagoran, iten ambrij alumudan do iten ambrij atagoran kan ate gamle (Sanenken 37:4).

Kan ambrij saring, amben dunglen sonuman saring do man’oihan batte ruangan atagorba yirben dete. Kitungan, butente lippan tiyaiten (Sanenken 119:16). Kan batte galamtabe absuigodan do hadab godan gamle. Anin aitsuman ambrij tagorlangten (Sanenken 119:77). Angante amben Kitungan atagorlingan ahaten (Sanenken 119:143). Tagorben agaja adside. Kitungan a bernan, atagorlingan d’ongben abtagorte (Bangsa Hanang 17:22). Ateng mandranji bibolan a kznolteji adnang (Bangsa Hanang 15:13).

Angante aninji bibolan akuteji itente rabangteji antate kznolteji. Bo bernan daku ayengan amandran amndrengna lingan Kitungan a itsuman saile. Amadan bondole, bibolan akudle itente rabangle antate anin kznolle. Anin rabangle Juda doidamneten gamle. Aten saring okij kun mandran akudle gijeten (Jakub 4:4).

Do anin rabangle kan ambrij: “Yira do kan ambrij luma gamle”. Okij anin kanina ambrij lumle do bibolan akudle barjanang rabangle kan ambrij: “amang itente lumte omeng luma gamle” (1 Jon 2:15). Kan ate aboi mandrandaman anogandi ayengan amandranji Kitungan aitsuman saiteji (Galatianji 5:24). Kikadage anogande batte. Kitungan a berna kinolba barij j’en batte, do barij monna do tiydamna batte.

Eteden Kitungan d’ongben olangte bangsale. Do mandrengnalingben a lippan ahangte. Gamangtungan a d’ong satta bantongba, bar barij j’e-benji batte. Anin a d’ong janardi lingan gankilba. Anab-yagi lingan, amben Kitungan a d’ong gankilba banantongan batte. Banantongan batte Gamangtungan a d’ong gankilba; tanakaran batte Anin amangban erdikanaba. Buteja mandra bagu gamangan. Iten asan gamlenden bo bzgarda mandran a d’ong anin timyimte. Ijjaden anin bo mandran a d’ong ganyimte, do bagarda mandran a d’ong puyingte. Amben Kitungan do lebun rapti aggangkile.

Okiy Kinolbe absele: “Mandrenggodan Aman apsuitih do temang-ling-Nam barij man’oihan daku. Aman a jandrumsengban er ahid man’oihan dakute.” (Sanenken 16:11).