Jan 06 – Tabme Gzdgzdludan!

“Antatiki aninji Samson a d’ong bagu tabme gzdgzdludan batte tolbadleji do kun lungaran saring anin a d’ong amdungle urunglaiji” (Bitsara 15:13).

Angante Israelanji do Pilistianji Samson a d’ong a tolbadben asan, aninji a papwran gzdgzdludan adsaijadji. Aninji tabme gzdgzdludan batte tolbadleji; anten asan luadan radu dakute adnatade. Bindo angante Kitungan a Jangardan ranaptidage yiraite amang-lingan, luadan atadle do yamangle (Bitsara 15:14).

Gamangtungan janang tolbadlangten tang-bigarda luadan batte; kun a luadan anatade orde adjuntude; itente tanimhimna. Gamangtungan Osea batte gamle, “Hen asuyeman a luadan batte do tanimyiman a tanolbadan batte aninji a d’ong mangba-Hen tabruijlai” (Osea 11:4). Kun a tanimhiman saring buteja anbangsabenji.

Ogandiba Kitungan a tanimhiman. Anin timhimbente indrang amben a timhimen. Indrang agalame, tanimhiman batte sedabenten, do asaiben asan yiraiten. D’ongben jobbasolan batte gabdille do tanimhiman batte abdainale. D’onmglen bargutulle do barij amihamna batte gijdale pintulen. Barij tanolbadan do anangang a pintunji sangaile, asuyeman batte. Barij a tanimhiman batte d’ongle murda buya-mar abmeaiten.

Anappai Pol Bo tonanan sakkin tiyle gameten. Barij manoihan batte, anin gamle: “Tanongba-hen Kristun amangban yiraite, s’inglen bo tabmedage ganutulan dele. Abmang anin agardinji ampara gailna-lingan dakule do barij s’ingan er-tarungnagge abmeleji. Do pasijanji batongleji do solenji sandin ajaitan. Anin dile ayam banadrab-lingan dakule, kanikuni gamle argoragge dele (Romi 8:38-39).

Bindo nami, barij banandan dele. Anin jale Jisun Kristun a d’ong engale ablumaran ambrij. Anin a gardinji ampara janang amainaben asan adlumad. Kitungan a boantan do dirnamaranji s’inglen ytirraiji; do a garberlenai. Pasijanji janagan uyubleji. Gamangtungan kuddub tabme abmele”. U’u, angante Gamangtungan iylai s’ingbale barijloge tabme dele. Engale Kitungan a bara kan ordarlingan dakule adnang, Anin gamle Jokiya a d’ong: “Nami Hen s’ing-ling-nam basutai.” Nami janang, Anin sanaisai s’ingben a basuben asan saite (Ejekiel 34:27-28).

Tanahimdam Kitungan a onagji, dile ayam ambendam anablu sindri-lingan abasuben dete. Angante Gamangtungan Jisu s’ingbaben yirtai, kitungdage a tanurdun, manoihan do sanabyun s’ingling-ben basute. Kuddub Kitungan batte dete.

Okiy Kinolbe absele: “Sanabyudage a tanolbad lingan Janggardan aboinan a rabrabben asan erba guijba” (Epissi 4:3).