Feb 25 – JEROBOAM JUN JILIKISHE AGETE!

1 Kings 11:28 “itu manu Jeroboam thakishe ekta tagot manu jitya laga; aru Solomon, sai kene ki jawan manu asile parishrami, bonaishe taike ekta daroga sob majdoor laga uporte Joseph laga ghorte.”

Ami khan dikhe bishi jawan khan eksaman nahoi aru taratari te thake. Tai khan kuchis kore koribole saman khan jolbazi te aru gire bishi samasya te. Kinika inika manu uthibo aru jiliki bo Isor karone? Aji laga podh te,a mi khan pore ekta jawan manu laga kotha Jeroboam laga. Tai parishrami thakishe; aru ekta tagotwar jitya laga manu. Tai thakishe kaam laga aru chunoti ke jitibo laga manu thakishe ji kaam dile bi.

Isor mate awaz dangor pora jawan khan ke koi kene: “uthibi, uthibi! Lagai lobi apuni laga tagot ke, o Zion”. Jawan khan uthibo lage ekta utsah thaki kene Isor nimite. Pobitro kotha te koi: “bishi khan sapha hobo, bonibo boga, aru chain loa, hoilebi biya khan koribo biya; aru kun bi biya khan nabujibo, hoilebi bhal khan bujibo” (Daniel 12:10). “uthibi, jilikibi; kilekoile apuni laga puhor ahishe! Aru mahima Isor laga uthishe apuni te” (Isaiah 60:1)

Raja Solomon  sai thakishe itu jawan manu Jeroboam ke. Tai paishe itu manu ke ekta tagotwar manu jitya laga. Tai thakishe parishrami aru gyani. Solomon itu pora akarshit hoishe itu tinta gun pora utu jawan manu laga, aru uthai dishe utu jawan manu ke uncha  zimedari te.

Apuni ke bi uthai dibo, judi apuni ke pai parishrami, kaam thaki chunoti janak manu. Pobitro kotha te koi: “ki apuni dikhe ekta manu jun uttam ase tai laga kaam te? Tai khara koribo raja khan agete; tai khara nakoribo najana manu agete” (Proverbs 22:29).

Judi apuni sorkari naukri te ase, apuni pabo bishi rasta kamabole laga asan tarika te aru ghus khan pora.  Hnoilebi apuni khara koribo lage nijor ke ‘Isor laga bacha’ hisab te inika mahol te. Judi apuni wafadar ase olop saman te bi, Isor pora dibo apuni ke adhikar bishi saman khan te. Apuni ashirbaad hobo aru Isor koribo dangor kaam apuni pora.

Sabi junaki puk ke! Isor laga day ate thaka, itu pora diye tai laga puhor andhera te. Kerosin tok bi diye puhor prithibi ke, tai para shamata tok. Bijli laga bulb bi puhor kore tai laga tagot hisab te. Jitya saman khan bi inika ase, ki apuni bi inika hi kaam diya aru puhor hobo nalage Isor nimite Tai laga daya hisab te?

Aji dhyan koribo laga pobitro kothha te hoile John 8:12 “titya Jisu koishe tai  khan ke, “Ami ase puhor prihibi laga. Tai jun piche hoi Ami laga naberabo kitya bi andhera te, hoilebi thkaibo puhor jibon laga.”