Feb 08 – JUNTU KHUSHI KORE BABA KE!

John 8:29 “Baba pora ami ke ekla charanai, kilekoile ami hodai kore utu saman khan juntu khushi kore Tai ke.”

Bhabna koribi kotha khan aru gawahi khan ami khan Isor Jisu Krista laga: “ami hodai kore utu saman khan juntu khushi kore Baba ke”. Ami khan laga isor Jisu hi khali ekta manu ase jun pora shikhabo pare ami khan ke kinika khushi koribo Baba Isor ke. Pura dhyana ru uddesh Tai laga jibon laga thakishe khushi koribole Baba ke aru koribole Tai laga icha ke aru mahima koribole Tai ke.

Jitya Baba isor icha korishe pothabole Tai laga Putro ke itu prithibi te, Krista Jisu ahishe agete khushi koribole Baba ke, koi  kene: “Ekta gau Apuni tayar korishe Ami karone… thakibi Ami ahishe – koribole Apuni laga icha ke, O Isor” (Hebrews 10:5-7). Tai baro saal thaka laga homoi te bi, Tai laga uddesh bishi sapha thakishe: khushi koribole Baba ke. Aru Tai koishe tai khan ke, “kile apuni bisarishe Ami ke? Ki apuni jane Ami ase koribole Ami Baba laga kaam ke?” (Luke 2:49).

Judi bi Tai shuru korishe tai laga mantralay ke, Tai laga gawahi inika thakishe: “Baba pora charanai Ami ke ekla, kilekoile Ami hodai kore saman khan juntu khushi kore Tai ke” (John 8:29). Ki apuni jane dangor ashirbaaad ke juntu apuni pai jitya apuni kkhushi kore Isor ke? Itu ase ashirbaad eki logote thaka laga Isor logote, kilekoile apuni kitya bi ekla nahobo. Maujudgi Isor laga gherav koribo apuni ke aru apuni laga morom Isor thakibo apuni logote hodai din. Tai kitya bi nacharibo apuni ke nahouile bi naphelabo apuni ke.

Baba Isor ase hodai hi apuni logote. Isor Jisu pora kosom dishe apuni logote thakibole hodai din, itu umor khotom nahua tok. Amen” (matthew 28:20). Judi apuni jiyai ekta jibon juntu khushi kore Isor ke, Tai lagamaujudgi hodai din hi thakibo apuni logote. Aru apuni mehsus koribole paribo Tai laga maujudgi ke aru usorte thaka ke, aru apuni kitya bi mehsus nakoribo ekla.

Jitya ami ekta bacha thakishe, ami kkhile thake chandh laga ujala te. Kityabi,a mi sai chandh ke aru berai. Judi ami berai aste, chandh bi aste berai thaka nishina dikhi pai.a ru judi ami polai, itu bi ami logote polai thaka dikkhi pai. Judi ami rokhe, itu bi rokhe. Aru judi ami luka baji khele, itu bi akash te luki ja nishina thake. Itu ami karone achurit thakishe. Isor laga bacha khan, jitya apuni kkhusi kore Isor ke Isor bi apuni logote thakibo aru berabo apuni logote. Aru apuni kitya bi ekla mehsus nakoribo.

Aji bhabna koribole laga thaka pobitro kotha tu hoile Hebrews 13:21 “itya hobole dibi isor shanty laga, bonabo apuni ke pura sob bhal kaam khan te koribole Tai laga icha, kaam koribo apuni te juntu khushi kore Tai laga suku te, Jisu Krista phine pora, junke gaurav ase hodai din karone.