June 14 – Butenden Rubmangbara Lumte!

“Do manarid lingan ganugun batte Aman a jongjong buten? Do senkendra lingan bantongidage do rubmangdage a bara mar Aman a jongjong buten?” (Hanagod 15:11).

Butenja a robjongan adean Kitungan a rubmang baran batte. Kitungan todorng ayam rumang bara lumte, kun batte rumangdage do anabsittadage dete. Mandrengnalingben ja rumang bara lumte.

Ategoi sonuman ja rumang bara lumte. Bibolingan ateng ayam kan ate kinolabe. Kudarn mangji Mojeso atimangba misor dessalingan rumang bara lumleji. Eja-po? Bibolan gamte jolda hanang tiymaranji do jolda tumatgiymaranji dungtinaiji do arabmadan bar rumangbara absuitaji, deleden, asanedamaranji ja. Bindo kan ate Kitungan atemangba anojorae. Kun asan Mojes ualeten, “Do manarid lingan ganugun batte Aman a jongjong buten? Do senkendra lingan bantongidage do rubmangdage a bara mar Aman a jongjong buten?” Kitungan rumangbara lumte amben asanaisajan ambrij.

Anin da’an saring drakiyada a rumangbara lumle. Anin ayon atodling saring lebun table tiyenten. Anin moloy ajar marangji a d’ong bagu ayo do moloy rutipu batte tiyjumetinji. Anin karahid maran a d’ong ayermengle. Bibolan gamte, “Bar er anogaldage a surda baranji Anin lumte, er danisamge rubmang baran lumte” (Ayob 9:11).

Amben bogad Kitungan amang saring rumang bara asailenden, mangben dirnna dakuben dete. Rumang bara dete uante dirnna dakute. Jisun gamete butente kitungan aganugu agiybe isumte amanglingan dirnna dakube dete.

Anualan batte dirnna yirtai. Anualan Kitungan a kambolan saring yirtai. Tiyje’eling a surpidamlinanden Kitungan a rumang baran dete. Manglenben dirnna batte barij a delenden Anin rumang bara lumte. Aparamangta saring Anapungge sikoija a rumang baranji giyle araptite, Bibollingan. “Anin a kuddub rubmang baranji apsele oblengba” (Sanenken 105:2).

Rumang bara apsele dirnna dakube dete, amben ja Kitungan amangba urpatamling gudinba. Do gamba, “Kun ayam lingan Ijekiya asun dean dele kahidben a tungna delen adnang anin Gamangtungan amangban garbereten, do Gamangtungan anin a d’ong jalangle do aboi arabmadan tiyeten” (2 Birinda 32:24). Je’e sumudroba a d’ongan mandranji gudileji. Kitungan kun sumodro bagu amele rumang bara absuile. Tanahimdam Kitungan a onagji, Kitungan garberben amdangle rumangbara lumte. Anin na Kitungan do Anin agaja abandane (Malaki 3:6).

Kinolbe absele: “Aman na rubmangdaman a baranji a lumten a Kitung; Aman a ranaptin Aman jattinji amang lingan gadlamte” (Sanenken 77:14).