Mar 29 – Dainan!

“Dele janang butente timyimlalen Anin batte kan kuddub abmele anlen jznjzn daina mar detabe.” (Romi 8:37).

Kan ordar-lingan duaihan do er maridan daku. janggardadage a d’ong abs’idben asan ruang-lingan janang Kitungan a mandranji amangling yirtai. Angante ganalaman dete amben aboi er t’ul do danuka-lingan er marid-lingan kan ambrij, amben agalamben dete do Kitunglen anlen ampara daina-rajan.

Bo ayam aboi pastron, a j’e-lingan ateng dukkadale, anin Kitungan a bara-lingan adakun asan, anin ateng danukka-lingan dakule. A birindalingan ateng kanalkalan dakule. Kuddub kan ambrij er t’ul-lingan do anin luluneten. Kan ambrij ayam-ling, anin agardinji do andrukku abaralenan amandranji, mailenji arberleji bangsale banangsa beran oblingleji. Anin gobba gametenji, ayimle abmang buten buten asayamben dete gamle bangsan abmele asenben asan adanukkan j’en abasuiben asan gobleji.

Pastron ambrij, asayamlenji bangsa baran alumleji amandranji a d’ong sanensenan do anabsitta-beran idolle. Asui adena-lingan, moloisoa amandranji amangba sittin apaiben dete. kan ambrij anin lumle, a j’e-lingan Kitungan atanimyiman barij dakule. Anin Kitungan a d’ong-abgugule, gamle: “Kitungan surda baran lumle mandrengna-ling-hen kan mandranji saring’. Engale anin abgugule, kuddub akanuddinji sagaile, do anin a baran janang susule bartabmelen man’oihan do asuyeman batte.

Kitungan d’onglen abgudingaite ariben asan bindo abdainaben asan. Bo surda buyan ambrij d’onglen gadlamlangten, manglen saring, anlen dile ayam dainan hangtaben. Ateng ayam-ling kanalkalanji dakute daina ahangben abmele. Jznjzn murdadaman abernan ate Kitungan anlen ampara dakute. Iten asan gamlenden Kitungan gameten: “Hen amben ampara dakutenai dile tordong, atanakudan sikoija” (Mattiu 28:20).

Kun sattanted. Marid Janggardan janang anlen ampara daku, kanina ate murda do ranapti. “iten asan gamlenden Anin na sattan murdadam anlen abmele kan ordarlingan” (1 Jon 4:4). Tanahimdam Kitungan a onagji, anlen dainan ahangben asan U’an amangba ajadrum-s’iban, amben janang dainan hangle Anin batte adakuten.

Okiy Kinolbe absele: “Butente dainan hangte, anin a d’ong Hen ampara raja garobgob ling Hen a gobben asan tiytai. Ettegoi na Hen dainan banglai do U’a-Hen ampara Anin a raja-gatobgob lingan goblai” (Anabpungge 3:21).