Mar 12 – Tai pora uthabo!

1 peter 5:6 itu karone, nomro kuribi nijor ke nichete tagot hath isor laga, ki tai pora hi apuni ke uthai dibo thik homoi te.

Jitya apuni nomro kure nijor ke aru thake nichete tagot hath isor laga, tai pora hi uthai diye. Hoi thik homoi ase apuni khan karone uthai dibole aru sonman kuribole. Hoilebi tai apuni khan ke akha kure tai laga hath bhitor te thakibole. Utu homoi naha tok isor pora apuni ke uthai thake, aru apuni khan bi uthi thakibo lage nijor laga rasta daya laga aru morom laga loi kene pura khushi pora.

Ekbar bhabna kuribi joseph laga kotha. Tai rukhi thakibole lagishe itu sob misa ilzam khan pora aru sorom pora juntu pothiphar laga ghor pora paishe itu jail te kati she. Ami khan puribole pai ecclesiastes: “sob saman te thik homoi ase, ekta homoi sob kam karone swarg laga nichete te.(ecclesistes 3:1). Hoi thik homoi ase isor pora diya sob kam khan karone. Ami khan laga isor jisu krista rukhishe thik homoi karone jun tu tai laga baba pora rakhishe, achurit kam khan kuribole nimite. Itu karone, apuni khan nomro kuribole lagenijor ke isor laga agete, tai pora apuni ke uthai nadiya agote.

Ekta chidiya laga kahani ase jun pora tai laga ghosla ekta kuhan laga bhitorte banai thakishe. anda laga bahar te ulaishe, itu chutu chidiya khan uribole bishi joldi thakishe, tai khan laga pankha bi naula agete. Kile koile tai khan uribole napare, tai khan kuhan te dubi jaishe. Judi tai khan itu ghosla te aru duidin thakile uribole paribole asile. Itu kahani pora amikhan ke yaad dilai rukhi thakibole isor laga thik homoi karone.

Pura 33 aru adha sal tai laga pura jibon laga itu prithibi te thaka homoi te isor laga chokra hoi kene, amikhan laga isor jisu krista ke kun bi jani thakani 30 sal tok. Kiman bi achurit laga kotha ase isor jisu krista  ministry aru manu khan majete nathaka tu. Hoilebi tai isor baba Jehovah laga homoi nimite rukhi thakishe. itu kaorne tai laga khata ministry laga homoi te bi iman achurit kam khan kuribole parishe aru aji pura prithibi tai laga naam ke jane.

Jisu kitya bi joldi te thakanai, iku kam te bi.  Tai sob kam khan kurishe Jehovah laga thik homoi te. Jitya mudu komti thakishe cana te  shadi thaka laga homoi te, jisu rukhishe aru baba pora diya homoi te hi kam kurishe. Chela khan jisu ke  bhal pora jani bo dibo le mon thakishe manu khan laga majete, aru tai khan koi thake jisu ke nijor kun ase manu khan ke janai dibo le. Tai khan koishe: “kile kooile kun bi iku nakure lukai kene hoilebi tai nijor hi janai dibole mon thake. Judi apuni itu khan kure, dikhabi itu prithibi ke apuni kun ase.” Hoilebi itu laga jawab te, jisu taikhan ke koishe: “amilaga homoi itya bi ahanai” john 7:6. Isor laga bacha khan, thakibi isor laga tagot hath laga nichete, aru tai pora hi apuni ke uthai thakibo.

 Aji bhabna kuribole laga pobitro kotha tu hoile 1 peter 5:5 inika nishina hi jowan manukhan, dibi nijor ke apuni laga dangor ke. Hoi  apuni khan sob ekjon ekjon ke, aru nijor ke nomro laga kapra lagai dibi,  kile koile isor pora hatai gamandi khan ke, hoilebi morom kure nomro khan ke.”