Feb 28 – Duita mon!

James 1:8 tai duita mon thaka manu ase, thik khara nathake tai laga sob rasta te

Itu bishi zaroori ase apuni khan nijor laga dimag ke ekta thik  jag ate rakhibole prathana kuribole ghutna te aha agote. Aru apuni khan aste pora sob hatai dibole lage jitu apuni khan laga prathana laga majote ahe. Juti apuni ekta prathana kura laga atma banabole napare aru ekta shanti thaka laga homoi, tinihoile apuni laga prathana iku kam nadibo.

Ekta zoo te, tai khan ekta alag chameleon rakhishe, juntu bishi manu sabole ahe. Tai laga duita matha thakishe. tai laga dusra matha tu hoile puchur phine thakishe. tai duita muk aru duijora suku bi thakishe.

Itu pora bishi manu sabole ahi thakibo pare hoilebi, itu janwar bishi biya jibon thakishe. jitya tai polabole kure, tai kun phine bi jabole napare, kile koile dui phine bi tai laga theng tu berabole kuchis kure aru inika hi kote bi jabole napare.

Inika hi ase bishi manu khan laga prathana kura laga homoi. Tai khan isor ke prathana te ahibo dibole mon hoilebi tai khan laga dimag itu prithibi laga dukh digdar pora bhorta hoi kene thake. Kunuba khan laga atma tu isor ke prathana kure hoilebi tai khan laga dimag tu din bhnor laga kam khan kinika kuribo itu hi bhabna thake. Ekta phine tai khan pobitro thakibole mon aru dusra phine tai khan biya bhabna khan kuri thake.

Apostle james pora koi: “tai ekta duita mon thaka manu ase, thik khara nathake tai laga sob kam te. Hobole nadibi inika manu ke bhabna tai iku bi isor pora pabo; hoilebi taikhan ke  Biswas te mangibole dibi, iku shak nakuri kene, kile koile tai jun hi shak kure nadi laga leher nishinaase junk e hawa pora hilai diye. James 1:6,7,8.

Apunikhan kinika homoi loi kene prathana kure? Ki jani apuni khan laga itya laga homoi  te bishi digdar khan thakibo pare, aru apuni khan bi duita mon loi kene prathana kure, nahoilebi apuni khan laga pap pora apuni sorom lage.

Isor laga bacha khan, apuni khan prathana kura homoi te ki digdar dile bi, nijor ke ekta thik jag ate rakhibi prathan kura homoi te isor ke bhabna kuribi aru taike Biswas kuribi. Janilobi ki duita mon loi kene prathana kurile apuni iku bi napabo, hoilebi age jabole paribo jitya apuni isor ke hi bhabna kuri kene prathana kuribo.

Aji bhabna kuribole laga pobitro kotha tu hoile Isaiah 59:2 hoilebi apuni khan laga galti por ahi alag hoishe isor pora; aru apuni laga pap pora hi dhakaishe tai laga chera apuni pora, inika hi tai apuni ke nahune.