Feb 27 – Ladladj’edamnan!

“lanagadan, ladladj’edamnan, kani a baran a dangdangben asan iteja a banaih anosaijan agassa” (Galatianji 5:23).

ladladj’edamnan janggardadage a j’on atanakudan a berna. Kan atanakud-lingan anidolan dele janang, kan ate murdadaman a berna kuddub Janggardadage a j’onji saring itente murdadage do d’ongan arabrabte ate. Ladladj’edamnan kuddub anabkalkalanji saring dongrabte, kuddub pintunji do togi-s’ingan saring.

Anappai Pol idolle: “Bindo bute bute Kristunate, aninji a d’ongan, a anogiran do magadan ampara, arakaddang lingan kabhidleji” (Galatianji 5:24). Kan ate ajardina a ladladj’enaben detena. Aparamangta pintun ordar-lingan, ladladj’ena adakulenden asan pintun lanuman dele. Kuddub mandranji a d’ong anagan dele oban abs’ideten ladlaj’enan asan kun ambrij a j’on, edon kutta-lingan.

Amben kan ambrij abrijdongne, bo jontun ambrij arabben. Amben alumben asan do itsumben Kitungan daneben dete, do maridam do ahangben. Ladladj’ena janardi maimaiben dete.

Anappai Pol baite murdaman aberna ladladj’enan batte, ranukun baranji abmele do atadnangben asan (Titas 1:8). Kitungan orde mandran ordar-lingan handramben dete ayengan amandran aman ladladj’ena daku. kan ambrij amandranji banangsa pangtaji bindo er banangsa abpagaiji. Asangim-baran lumteji do ragal j’on a janggardan ted.

Galamtabe kan ambrij a bernanji. Ayengan amandran ladladj’ena-ligan dakute, banangsa-lingan dakute do banudin pangtai, kan ambrij lumle anin ranubaban anabdaina hangte. Kun ambrij, itente Kitungan d’ongben baile kuni-lingan amben janang tiyj’enaba, ladladj’ena batte do barij banangsa batte, barijloge erahid mandrengna ranubaban.

Amben abrijten Jisun amangba bo sanengsengan batte, ayengan mandrenglinglen asusuna do atanakudan dirnalinglen. Angante anlen abriytinben kan ambrij, ladladj’ena jznjzn murdadage mandrengna-lingan. amben agalamben dete itsumben, baranji do lanumanji. Eteden amben daina ahangte adrijnalingan.

Tanahimdam Kitungan a onagji, Kitungan anabagu dayerna s’i-lingan daku. do erabdingdinglingben, amben ladladj’enan batte abrijnaben dete, do daina batte ranubaban ahangben dete.

Okiy Kinolbe absele: “Umpar maran saring lesa bandrab mar bangsa, bar gardan abladnaten a mandran saring janggardadam lingan daneten a mandra bangsa” (Bangsa Hanang 16:32).