Feb 23 – VAAYA

Yohan 2:1 Theenmo daad Galilayar kaana gamema yek vaaya chaalo ; Yesur yaadi votha ra.

Dever vathema vancheju Yesu Prabhu Yesur yaadi  ann Vor chelavo seji varema theenmo daad vo vaayan balamangamelethey. Vo dadema chajako callendarer prakar dekatho Agadiyar daad Dithvar deemo daad Sommar ann theenmo daad Mangalvar. Katho Mangalvar theenmo daad vethi. Yeedadema Mangalvar katho kuni khathar kareni , vu dadema kuni kunsi kaam kareni kathik jaavnukathoi jayeni vothi jada vaaya asal kareni. Atho yee vaaya Mangalvarer dadaj vichkan dekacha.

Yesu baapun sada balamelechkatho vu vaaya kidejako vu daad reda vu vagathen reda dekanaju vaaya kidethech. Vorsaruj Yesu vor yadi ann chelavo votha jayen dall kidey. Lapan aajkal acho daad key konika kan Yesun dhokeval sada vaayar card maravjana kanna shuru karacha ,kanna vejavacha kajako vagathen sada lakkamelacha. Yekvela ass vaayan Yesu bapun balayevatho athra puro dallethi vo vaayan jayekey. Yekhaptha sos kartho?

‘Theenmo daad’  vathen thodsek vagath dhyan karatho. Yesu Christhu huvojako dadethi ghallen abbethanu 2000 varasvegich. Yee theenmo daad Yesu Christhu pharan ayer daden dekalacha. Yee theen dad Prabhur nazarema dee dader nai cha. Ajji theenmo daad ken dekalach katho Christhu Vor sath bhakthidharevun sath lelen avajanna1000 varas gorlir vaayar khoraki khayer jagen balavacha. Yekkaj haptha 2000 varasethi jaada vejarijako yee dadema Vachan kacha Darshaner Grandh 19:9 Gorlir pillar vaayar telena  balamalejako nasheebdhar.

Vo gorlir pillar vaayama Yesu Christhuj vethaduven racha. Vor layeethi mol lidojako sabha navlerir nai racha. Navleri vaayar jagema geeder aatethin nachkudan kuvatho mayima avachko hanoj asmanethi Prabhu Christhu Pradhan sojar thuthurathi ann Dever mundemathi avajako aatethi  heta vutharan avacha. Janna thar jaaner jigari venchajako thar Prabhur  munden yeken yek Deklocho. Abba Vu vagath kathra mahimar dad venriye kunika. Vu vaayama sey mulathi amelejako moto janner malavethi ann Abraham Issac Yakobethi sada bhalan khushi karacha.

Vo vaayama angurer rass khuteniju masaj pasandethi khanpimacha. Thon chavnujako sejini Christhur mahimama phitanjavacha. Mar premevalavo thar janer jigaru venchajako Christhuna vo mahimar dadema bhalen siddanga chika? Katho vu Christhur agamanema bhalnu katho Thu ghano jagruthithi ren ghasan dekukarnu.

Ajji jada dyan karen pado Darshaner Grandh 22:17