Feb 19 – Tambusingan!

“Kun a dinna lingan Hen Daudo aradwblen a tambusingan barokij abdztai do kun lingan a pardar-talanji tumbadtai; bar ranardai darakunanji barokij abdztai do antate purban ayaman ambrij Hen bargutultai” (Amos 9:11).

Teddne ‘tambusingan’ Noa ayamling Papwr Anosaij-lingan. Anin drakyadan gale do gale (Aparamanta 9:21). Anlen janang Lot pangle atambusingan do eyetin gutule Sodom-lingan (Aparamanta 13:12).

Abram janang a dirnan tambusing-lingan. bo bigarda disa-lingan dirnan batte iytin-basue, Isak do Jakub tambusinglingan basuleji, janibjib disa-lingan (Ebri 11:9).

Isak tambusingan aboi sindrisingan dakule tette saring tiyj’eneten. Jakub janang etigoi dakule Kitungan amang agarbernabe. Bibolan gamte: “E Jakub, tambusing-nam yan a langga; E Israel, barasu darakuna-nam yan a bangsa!” (Danisam 24:5).

Ateng tambusinganji dakule papwr anosaij-lingan, kan aboi Daudo a tambusingan Kitungan abdainale. Kun Daudo a tambusingan anabgugu batte barij dakule. Kun abarasuling anabgugu do man’oihan batte sanensenan. Bibolan gamte: “Roitad maranji a tambusing linganji man’oihan do anablun a uai-sarrangan anamdangan dete” (Sanenken 118:15).

Daudo atiki ayamling, ateng ayam atiki, anlen gijle adrabtibe mandranji tongsenle do kznkznlen anin ambrij alumeten ate. kun saring Anappai maranji adnang dele, nami enegoi bo surda radjangloge anabgugu gijle adraptibe namitan sikoija.

Bindo Kitungan jzbjzblen Daudo ambrij a tambusingan gutulte, etente er gijtage daku. anab-bagu dayerna endrang arduaien sikoija, Kitungan aitsuman janabobon anabgugu alaben asan a mandranji a manglen. Anin d’onglen abdainate, butnte a d’ongan abgugute, senkenrate do abpemengte a d’ongan, engale Daudo lumle.

Kitungan adyerna tuyale. Anten asan, engale Kristun sidrung-maran, anlen amukaban ayirben dete anerdakan batte tongsenglen kznkznan batte, uggarlingan man’oihlen anabgugu do sanensenan batte. Anlen danukkan do sintanan batte ganijtan dedongete.

Tanahimdam Kitungan a onagji, Kitungan d’onglen miholan batte ajabobben abmele oskailen daku, do uggarlingben man’oihan batte. Anin bar gutulte Daudo ambrij a tambusingan.

Okiy Kinolbe absele: “Amben andangba! Baru linganji abo sarrangan, onla maranji a uai-sarrangan ambrij saddate. Amben amdangba! Rajamanji do jattinji a rukkutenanji a uai-sarrangan saddate” (Jisaiya 13:4).