Feb 18 – Bhabona!

Daniel 1:8 daniel bhabona kori loi se tai tate laga raja laga ghor laga kha loa khan aru mudu khan ke khai kene nije ke moila nakuribo aru itu nimite Ashpenaz laga modot mangise.

Apuni khan sob bi bhabna notun banai thakibo itu notun salt e itu kuribo inika kori bo koi kene. Aru kunuba kotha khan tu inika ase ki apuni khan sob mohina aru sob din te kuribo lage sob salte itu khan hi sob se zaroori ase apuni laga atma ke bacha bole nimite  aru apuni laga atma laga jobon ke uthai thakibole.

Sabi Daniel laga bhabona itu verse te . itu ekta bhabna  thakishe ki tai ekta pobitro aru sapha jibon thakibo, itu dagi aru moila nathaki kene. Aru isor pora Daniel ke sonman kurishe , kile koile tai kiman bhal bhabona thakishe.

Jitya apuni icha khure ki apuni ekta pobitro jibon thake, isor aru bi bishi icha kure ki apuni nijor laga kotha te thik thakibo aru tfai laga pobitro rasta te berabo. Pobitro kotha te koi: hoilebi tai jun hi apuni ke matishe pobitro ase; apuni bi pobitro hobo pare apuni laga sob kam te. 1 peter 1:15. Isor pora apuni ke cholabole pare jitya apuni bi kiman pobitro hobo pare itu laga tagot te. Itu karone , hodai din notun koribi apuni laga kotha te pobitro hobole laga.

Dusra kotha tu hoile, sapha faisla lobi ki kun  bi nagiribole, apuni nimite. Apostle paul pora koi: apuni khan ekjon dusra jon laga bhal biya khan sai kene faisla koribole bon kuribi. Apuni khan inika iku bi nakuribi juntu pora apuni laga biswsasi bhai kokai khan biswaste gir jabo nahoile pap kuribo. Romans 14:13.

Aji kiman bi bishi suku jula aru mon  biya paa ase manu khan laga majote, kile koile manu laga kotha koi thake aru itu pora hi tai khan nijor laga rasta ke bon kuri loi. Kunuba khan tu alag niom khan ke cholai thake, aru isor laga morom pora alag hoi jai aru itu pora hi manu laga Biswas ke bi girai diye. Apostle paul pora likhe: ami laga prathana ase apuni khan asol bhabona pora aru thik pora  buji kene apuni khan laga morom aru bi bishi hoi jabo. Inika hoile apuni khan janibo ki sob bhal pora bhal ase. Tini hoile apuni khan krista laga din te sob biya aru bondam pora bachibo. Philippians 1:9,10.

Tisra tu hoile, apuni khan itu bhabona kuribo lage ki apuni khan nijor laga mukh laga sima par nakuribo aru itu pora pap hobole nadibo. David koi: ami bhabna kurishe ki ami laga mukh sima par naukuribo. Psalms 17:3. Bishi pap kure tai khan laga mukh laga kotha pora. Gyani Solomon pora koi: apuni jiman bishi kotha kobo, iman hi pap kuribole laga bhoi te thakibo. Dimag thakishe koile apuni chup thakibo. Proverbs 10:19.

Hodai din ekta thik bhabona kuribi apuni laga monte ki apuni khali isor laga kotha ke kuribo aru apuni laga kotha khan ke pani te jabole nadibo. Isor laga bacha khan, isor por apuni ke hosa bi ashirbad kuribo, judi itu bhabona apuni thik pora dhuri kene thake.

Aji bhabona kuribole laga pobitro kotha tu hoile james 3:10.11 itu iki mukh pora hi ashirbad aru shrap bi ulai. Bhai kokai khan, inika nahobole lage. Ki jharna pora mitha pani aru tita pani bi ulai?