Feb 18 – Gabrij’enan!

“Bindo Daniel raja-janumjumanji do drakyadan batte anindaman er marid abmedamnaben asan a j’e lingan adnitsumad…..” (Daniel 1:8).

Kuddub mandranji Tabme mihnuman adnang gabrij’etenji kan ambrij okkaleji. Dile dinna do dile angai-ling a tabme mihnum-lingan agabrij’enaben dete. Janggarda mandrengna-lingan kan ambrij agabrij’enaben detena.

Daniel a gabrij’enan abmele agijte. Kan a gabrij’enan marid do mardir mandrengna lingan a dakunaben apsele, erabsidlabe orde erab adilelabe a d’ong. Do Kitungan a d’ongan apemengle, anin bo bangsa gabrij’enan apanglen asan.

Angante ambn marid mandrengna abhanaten, Kitungan aitsuman d’onglen manaridlingan a dakuben asan. Bibolan gamte: “bindo engale Butente gudingtaben mariddam daku, ettele amben ja manannen a passijge a kuddub mandrenggod lingan mariddam deba” (1 Pitor 1:15). Kitungan satta hamdranglangten manarid-lingan. Ateng asan, dile dinna manarid-lingan surpidamnaba.

Anab-bagu, raduloge jibjibnaba ejaden butejanang kurtabenji, amben abmele. Anappai Pol gamete: “Bindo osantan yante .gamle itente abpab- bate, orde abasudete, antate- buhang-ben a tangor lingan amben addakkue,kanate gabriba” (Romi 14:13).

Nami, ateng abruna do anasangeman daku, mandranji kani kuni agamteji do bo bigarda maranji abmele anabkalkalan adeten ate. buten buten ate bo bigarda ganalamban anurungan adete ate, Kitungan atanimyiman saring sagai yirteji do bigardanji abmele aboi kanalkalan ambrij hiyte-de-e. anappai Pol idolle: “kanate hen garbertai, yante gamle amben jznjzn bangsa janabanji rapti a ordete, yante gamle Kristun a dinna lingan amben mariddam” (Pilippi 1:9-10).

Anab-yagilingan, amben agabrij’enaben dete t’odben batte kayatinge er-delabe. Daudo gamte: t’od-hen batte erszn adlumai, gamle gabrilai” (Sanenken 17:3). Ateng pintunji yirtai t’odan saring. Solomon ganalam-mar gamle: “Ateng berna lingan danusan er asuige adde-e, bindo ayengan a mandra anin a usaltaman ladladte anin banuddidam” (Bangsa Hanang 10:19). Dile dinna, uggar-ling-ben gabrij’enaba, eteden amben Kitungan a berna aberten, do mandran a kayatin beranted.

Tanahimdam Kitungan a onagji, Kitungan batte amben anabsittan ahangte, bogad kan ambrij agabrij’enan mandrengna-ling-ben adakulenden.

Okiy Kinolbe absele: “Aboi t’odan saring sanensenan do anangan dungte. E buhang-henji, kanate ettegoi a deben asan sakkai ted. Bo dungdamd’an abo puttaran saring ragaldam do asangdam d’an amdungte po?” (Jakuban 3:10, 11).