Feb 16 – Rojol bara!

“Bindo rojol-j’e maran rojol baran apsele ogalte, do rojol bara lingan tanangte” (Jisaya 32:8).

Rojol bara gamlenden atiydamtenan amandran, tanimyiman a uggaran batte. Do dile Kitungan a pasijanji, kan abara alumben dete.

Kan abmele anlen gijtabe, mandran saring. Aranebanji j’on tiytji adsangin ambrij. Itedelejanang ateng danisamanji ambrij, gajanabanji tiyle raptiteji kan akuddubanji. Adrenji janang tiyle raptiteji, dile dinnaji abmele. Ganungan ayoji, mandranji ajanumjumanji. Angante ganaganji mandranji abmele, yang arubmandage kan mandranji abmele ijapo? Amben Kitungan Jisu Kristun ate ted po?

Jisun oaleten: “Itente henate, kun batte itente hen itsumtai, antate a lumben asan hen apsele rapti adde-e po? Orde hen asuyemdalenaian asana man abdruten po?” (Mattiu 20:15). Bo bigardaberan batte, Anin oalangte, anlen darda uggaran dakupo gamle, angante Anin tiylangten. Jisun Rojol j’e batte tiylangten. Anin na d’onglen atiylangtinan a Kitung kuddub ayam-lingan. Anin na kuddub mandranji a d’ong awrloge atiyte a Kitung anabsittan engale moiloi rutipun do bagu ayon batte. Anin bo bangsadage a Kitungan ganuran tiylangten bangsa do er bangsan ayam.

Kitungan Jisun gameten: “Bindo asanggem mar-benji a d’ong timyimba, bar banangsan abmeba, iteja okij a hangben asan er derderrenbe reyan tiyba. Bar uhulkkui-ben surda dete, do kuddub saring Lanangkan a onggeronanji amben a dete. iten asan gamlenden Anin er sensen do erszn maranji apsele banangsan abmete” (Luk 6:35).

Josep a mandrengna gijgijba. Anin rojoldam dakule. A buhanganji asangemleji, lugarlingan pidleji do boantasinglingan timleji.

Bindo angante Josep anab daina dele, anin abpungele a buhanganji amang asanayaman do a rojol baran. Anin barijloge a buhanganji a d’ong ganagan tiyle do didargam lebunji janang (Aparamangta 42:25). Auan akahidlen atiki janang a buhanganji asuyeman batte tiyjumetenji. Anin a d’onganji bangsa barara janongan tiyle do baraling amengnaben abmele.

Angante Josep rojol-loge baralen, yang a man’ohan amben abmele, ayengan amandranji ruangan danetenji Kalbori atanimyim maranji! Tanahimdam Kitungan a onagji, amben asuyeman batte banagenji a d’ong rojol j’e batte sayambaji. Eteden Kitungan ajar ajar trading tiytaben.

Okiy Kinolbe absele: “Gamangtungan hadab ayam lingan jannong-ling-ben ganuran appaiben asan do s’i-ben a lanum a kuddub bara lingan absittaben asan, Anin a bangsa gulumising, manan, riangan rzte. Seletten amben ateng jatti maranji a d’ong rirdan a tiyte bindo amben rirdan adnie pange” (Bagujuanaber 28:12).