Feb 10 – Marangte!

“Iten asan gamlenden hen batte dinna-namji marangte, bar ayam-nam a minhumanji marangle yerte” (Bangsa Hanang 9:11).

Dile tabme dinnaji Kitungan ataniytiyan na. Dile minidan do sekenan saring tagaldan saring tungar-togalan, Kitungan amurda taniytiyan-na. Anten asan, d’ong-ben banaihan dele adilinan atiki Kitungan a d’ong abgugule senkenraba.

Angante amben Kitungan a d’ong abgugute susuna dinna-lingan, kun a dinna-lingan amben galamle araptite yan asanittan gamle. Amben agijte abumung sososte itente dakule kanalkalanji do anabkalkalanji yaryarmanengba adakule ate, do amben kan ambrij alanumudanji anabkalkalanji saring aite gane erahid paneradba.

Anin atanurdun, Anin aranaptin do Anin asuyeman amben ampara dile tordong dakute. Kan ambrij, bo dinna susuna bokurdi-unji gontan batte. Bindo Ebri maranji apsele orubrub lingan susunan dete.

Itedeleja ambrij, ayaman danisaman dete, Kitungan d’ongben gamle Hen amben ampara dakutenai atanakudan sikoija. Dile Anin amben ampara dakuten, dile minid do dile dinna mandrengna lingben. Anten asan, mandrengnalingben garberen do himdamnaba Kitungan atanurdu.

Pastor Pol Yonggi Cho, dile dinna anin aboi aboi ahiman tiyle do gamle kan ate Kitungan ataniyberan. Berna asan, bo tabme dinna anin adhimle ‘Maridam’, senle do abgugule Kitungan abmele Manaridan, do manarid-lingan ayirben asan. Anin anbbiyo adhimle ‘Garberan a dinna’, do kun bo dinna-lingan anin garberlen dakuten. Okij etegoi adhimte anab-boi dinna ‘Asuyeman a dinna’. Anin m’oihln dakule kan ambrij adhimle dinnaji.

Sanenken Daudo janang kan ambrij dile tabme dinnaji adhimle. Anin dile tabme dinnaji adhimle kan ambrij ‘Banangsan do Sanayaman’. Anin man’oihan batte abpemengle do banangsa do sanayaman amandrengna-lingan sandungte, do kun ambrij dile dinna anin rabangle. Amben janang Kitungan amang saring kan ambrij ahangben dete. engale Anin amben ampara daku.

Tanahimdam Kitungan a onagji, angale uyungan yeryerten ordaran amanengba, amben janang mandrengnaben Kitungan amangba enegoi dakuba, barij dinna-lingan. ajardinna amben amarangte do Kitungan abmele apuangte.

Okiy Kinolbe absele: “Kanate Gamangtungan a gabdellen a dinna; anlen kani dinna lingan a m’oihnaba do a erdikanaba” (Sanenken 118:24).