Feb 09 – Lippan!

“Berna-Nam j’eng-hen apsele lippan, do tangor-hen apsele paniradan” (Sanenken 119:105).

Lippan dakuleden agalamben aberan do j’engan adgalue do tagorben saring agaludong. Ateng ayam, lanumudan yeryermengba daku do anlen karahidan sanle janang yirtabe. Pwrba ayamling Lippan dakulenden uyub mandran dakule. Mandrengna atagoran apsele Kitungan a bernan na Lippan.

Dile dinna amben pedde agijle torchon anbta’ar abmele. Kunilingan, kun atanaran batte kuddub lanumaudan sagaite. Iten detenben kun mandran etigoi lumud-lingan yiretenden, bogad kun torchon abpagetenden? Anin pedde kahidtaben ja’adja duletenden kun lumudlingan.

Anagajadan saring sonuman ateng bisadam. Bindo angante mangbaben Kitungan a berna dakute, aboi ataljingben a lippan ambrij, amben galamle araptite sonuman d’ongben kurte gamele. Lippan a tanaran batte, kun batte amben galamle araptite iten ambrij asangem-tagoran, iten ambrij alumudan do iten ambrij atagoran kan ate gamle. Kan ambrij saring, amben dunglen sonuman saring do man’oihan batte ruangan atagorba yirben dete.

Kitungan, butente lippan tiyaiten, kan batte galamtabe absuigodan do hadab godan gamle. Anin aitsuman ambrij tagorlangten. Angante amben Kitungan atagorlingan ahaten, tagorben agaja adside. Kitungan a bernan, atagorlingan d’ongben abtagorte. Ateng mandranji bibolan a kznolteji adnang, angante aninji bibolan akuteji itente rabangteji antate kznolteji.

Bo bernan daku ayengan amandran amndrengna lingan Kitungan a itsuman saile. Amadan bondole, bibolan akudle itente rabangle antate anin kznolle. Anin rabangle Juda doidamneten gamle (Mattiu 27:5). Aten saring okij kun mandran akudle gijeten. Do anin rabangle kan ambrij: “Yira do kan ambrij luma gamle” (Luk 10:37). Okij anin kanina ambrij lumle do bibolan akudle barjanang rabangle kan ambrij: “amang itente lumte omeng luma gamle” (Jon 13:27). Kan ate aboi mandrandaman anogandi ayengan amandranji Kitungan aitsuman saiteji, kikadage anogande batte.

Tanahimdam Kitungan a onagji, Kitungan a berna kinolba barij j’en batte, do barij monna do tiydamna batte. Eteden Kitungan d’ongben olangte bangsale. Do mandrengnalingben a lippan ahangte.

Okiy Kinolbe absele: “Bar kan lingan anlen a jznjzn erztnage tungmadgijberan daku. Amben antate lungud darakuna lingan a puangten a lippage ogandjan ogandile s’aran endrang de-en sikkoi ja, do uggar lung ben s’arsungan endrang dungen sikkoi ja kun abmele ulamattaloge a delenden bangsa dete.” (2 Pitor 1:19).