Feb 08 – Dyan!

Psalms 104:34 Ami taike dhyan kura tu taike  mitha hobole dibi; ami isor ke khushi hobo!

Dyan kura tu hoile ekta dangor adot ase ami khan laga atma uthibole nimite, aru itu pora bishi bhal jaga amikhan laga jibon te loi. Tai laga anubhav pora, amikhan dikhipai david dikhai kinika  mitha ase isor ke dyan kura tu. Ekta dhyan thaka laga jibon tu bishi zaroori ase isor laga bacha khan karone. Itu pora hi modot kure bhal kuribole aru tagot dibole apuni khan laga  bhabna ke jibon laga.

Apuni khan kitya bi napahori bo lage ki jita aru hara tu hoile ekta manu laga  dimag te hi shuru hoi. Jitya kunuba isor ke dyan kuribole napare , satan pora hi itu laga faida uthai aru utu manu ke bishi lobh  aru biya rast laga dhyan kuribole diye. Tai pora ane bishi pap laga bhabna aru taikhan ke uksai itu lobh khan ke pura kuribole.

Sob pracharak khan ke ami khan saile pobitro kotha te dikhi pai ki tai khan bishi homoi isor laga kotha dyan kura ke. Ami khan dikhe ki Isaac bahar te ulai dyan kuribole kheti te sham phine, genesis24:63.

Jitya david tai laga dyan laga kotha likhe, tai koi: psalms 119:148 pura rati uthi kene ami apuni laga niom khan ke bhabna kuri thake.

Dyan kura aru prathana hi apuni laga atma laga tagot ase. Aaru dyan kura apuni khan ke isor logote bandhe.

Poila Israel laga bacha khan canaan laga mati ke naloa agete, isor pora koishe Joshua ke niom laga kitab ke dhyan kuribole. Joshua 1:8 niom laga kitab ji hoile bi apuni khan laga mukh pora hati bo nalage. Hodai din aru hodai rati ituke poribi, aru tate ki ki niom khan likhi kene ase itu khan ke thik pora mani kene thakibi. Tini hoile apuni khan ji hoile bi jitibo aru bhal pora thakibo.

Bhabna kuribi itu verse uporte. Bishi judho laga jaga thakishe Joshua laga agete canaan laga matite. Tai sata desh khan logote lorai kuribole lagishe aru 31 raja logote canaan laga lorai kuribole lagishe. ​Gau laga tagot hi bishi zaroori thakishe saishe kuile itu lorai khan te jitibole, hoilebi sobse zaroori tu hoile atma ke tagot dibole hi ase. Aru dyan kura niom lga kitab te itu bi zaroori rasta thakishe inika tagot pabole. Isor laga bacha khan, jibon dyan laga hi ashirbad pora bhorta hoi judi itu laga hisab te thake.

Aji bhabna kuribole laga  pobitro koth atu hoile psalms 39:3 ami lagaa mon gorom thakishe ami bhitorte; jitya ami bhabna kure, itu jui jule. Titya ami huti bole lagishe.