Feb 08 – Tiyj’enan!

“Anin amangban jaru anogal-j’e-hen sarwm anangnuran de-ete; hen Gamangtungan amangban m’oihtenai” (Sanenken 104:34).

Tiyj’enan janggarda-lingan sanaisaidam, do kani na ate janggarda mandrengna –lingan sanaisana. Kuddub baralingan, anlen gijtabe Daudo gadlamlangte anin Kitungan amangba atiydamneten ate. Kitungan a mandranji jinjin murdadam atiydamnaben dete. kanina ate sayamlangten dernalingan do bara-lingan anogal-lingan do mandrengna-lingan.

Amben akaridadong dainan orde er dainan mandran asusute adnang j’e-lingan do monna-lingan. Angante bo mandran tiyj’enalingan er daina dete Kitungan amangba, sonuman mandran a d’ong a gadluben saite do kun apsele anin er tarungna baranji adlumlumte. Anin pintudage a bara adlumlumben abmele oskailen dakute tunjingle do tabruile agadluben asan.

Badlohim maranji apsele anlen gijlabe bibol-lingan, ateng ayam aninji tiydamling dakulenji Kitungan a bernaling. Isaak abmele anlen gijtabe orub-orub adnang anin iten tiyj’ene (Aparamangta 24:63).

Angante Daudo idole anin a tiyj’eneten abmele, anin gamle: “Hen yante gamle berna-Nam kenolle ogalj’etai, anten asan tampagal mad-henji a lzngna” (Sanenken 119:148). Tiyj’ena do garberan pwrardalenji abmele ranaptin-na. Do tiyj’enan batte Kitungan dongrablangten.

Israel amandranji Kinani desan adanelenji, Kitungan Josuan a d’ong gamle anosai kamb’olan tiyj’ena gamle. “Kan anisai kambol beranji t’od-nam saring dunglen yerdongete bindo aman antate a tam anidan ambrij a manneben asan tamba-togal kenolle j’e-ling-nam ogalla, etteden aman apsele banangsan dete” (Josua 1:8).

Kan a berna-lingan. Ateng sanulodanji dakule Josua amukaba Kinani desa-lingan. gulji desanji dakule do bokurdi-galmui kinani rajanji. Angante d’ongdage aranaptin sanaisai kan abmele, kun saring anin ateng murdam a monna do a pwrarda-lingan dakule. Do anosai kambolan atiyj’enanben kunina ate jinjin murdadam dakule ranaptin ahangben asan. Tanahimdam Kitungan a onagji, atiyj’e tenan amandrengna na anabsita mandrengna, do kun ambrij adakunaben dete.

Okiy Kinolbe absele: “Uggar-hen tanagin dele; ogalata ogalata hamangtudge delih. Seletten hen al’ang-hen batte berrenai” (Sanenken 39:3).