Feb 05 – DHAAK

1 Samuel 27:1Jerpach Daveed – Ma yetha rero aacho koni.  Kunasko yek daad Sauler hathema ma sathyanash vejavunchu; ma Philisthiyar deshema jaan gunjavunchu  jana saulu yisraeler sarihadduma dhunder chonakacha jethi vor mathema haljavanaju dhanjavunchu keledo

Yee vachanema Daveed Saulethi ghano chamkrochkan dekancha. Kukatho yekdaadnithi ajjekdaad Saul manna marnakacha kan. Jethi Daveed Saul dekervenijako jaagen ann Daveed bhadranga rajako jagen ghusen javnu keldotho.

Aajkal sada masaj Dever sevakareval yeej dhakethi sataner hathema haljathanu paapema padan niyathen chonaken Devethi door dagar javukaracha. Katho satan paapichajen cheepeni pan Devema ghat chajako Dever sevakarevalenaj cneepan latkanakeraj vor kaam ken herdey mella.

Kukan katho Herod rajer mundag vor beti nachan von khushi padachitho vo betin thon aado rajena vathoi denakuchu kan kojako vathen paakthin meladen vor yadi kijum Baptis Yohaner mathen kaatan dakan puchi. Hanoj niyatheydharer matheynaj bhuthen chavnu. Atho bhuth hanu kasen karachkatho Dever sevakareval vunder vummarer dadema hetpadachko koniko kan paricho karacha.

Daveeder dhaak saha vuj Saul mann marnakachkaiko kan Philisthiyar deshen dhasan dagargo. Vo anyadesher rajer dai jaan raajer dayapalevasu manna thar dai matho goklen jaag chakai kan pucho.

Daveeder jeevanema kathra mando daad aayich kunika, dekatho Yetha Daveed Dever daithi soli mangan puchlevalo abba Philisthiyar anya desher rajer mundag hubaran manna aasro daakan puchotho Siklag kajako gamen dino vothaj Daveed ghano vela pado.

Athraseji chalijer pacha Daveed kukan hoto pharo? katho Daveed Deven pucho Baapu ma Yordhaner kunsik yek gamema javukey kan puchotho, Dev hanu ko Thu Hebronema rejo kan samadhan dinotho, Daveed Hebronen go. Hebron katho Sainik kan aratham. Vothaj Daveed rajer nai abhishek palido. Yethaj Dev Daveeden ghano ashish karan vuncho pado.

Mar premevalavo thar jeevanema kathra dhakpader vela avathoi thu Dever vumper adhar padan Dever sam deko.

Ajji jada dyan karen pado Geeder Grandh 73:24. Thar soser nai manna chalaan aakhariper mahimama Thu manna lelechi.