Feb 04 – Anlen a Gangkiltai!

“Bindo hen do singmar-henji anlen Gamangtungan a d’ong a gankiltai” (Josua 24:15).

Josua agamte a bernan anlen tettne rabatabe. Tamil langlang-lingan bangsale anidolan dele. Kan ambrij anidolan dele ‘anlen Kitungan a d’ong agankzlba’, bindo radu gamle gamte: ‘anlen Kitungan sattang agankzlba’. Anin do aninji radu gamle bangsale gamteji anlen bigarda a kitungji adgankzlbe.

Kitungle Jisun gameten: “Buteja mandra bagu gamangan a d’ong rapti aggangkile. Iten asan gamlenden bo bzgarda mandran a d’ong anin timyimte. Ijjaden anin bo mandran a d’ong ganyimte, do bagarda mandran a d’ong puyingte. Amben Kitungan do lebun rapti aggangkile” (Mattiu 6:24). Kan ordar-lingan bagu gamanganji daku. aboi ate Kitungle Jisu Kristun, do anab-bagu ate Sonuman. Amben Kitungan a d’ong timyimba do sonumman a d’ong ardiba. Bogad amben Kitungan a d’ong a timyimleden, Kitunglen, eteden amben Anin sattang agankzlben dete.

Anab-bagu lingan, angante amben Kitungan a d’ong agankzlte, barij j’en batte gankzlba, barij pwrardan do barij ranapti batte. ‘Barij J’en do barij pwrardan’ gamlenden – barij kandar d’ongan batte aganankilan. Engale school-s’ijanji barijloge tiydamtenji, a porikya-linganji; amben janang kuddub tiydamlen Kitungan a d’ong agankilbe dete. “Gamangtungan a d’ong satta bantongba, bar barij j’e-benji batte Anin a d’ong janardi lingan gankilba….” (1 Samuel 12:24).

Anab-yagi lingan, amben Kitungan a d’ong gankilba banantongan batte. Sanenknan gamte: “Banantongan batte Gamangtungan a d’ong gankilba; tanakaran batte Anin amangban erdikanaba” (Sanenken 2:11). Kan a banantongan bo bigardaban abandanabenanted eteden panadradan mai-sattang hangtabe, orde Anin bimbimanji apaitai orde rugamanji apaitai. Kan aboi bo surdadam abanantongan, kan ate Kitungan atanimyiman batte adeben dete. “Gamangtungan amangban banantongan ersz ardermadan” (Bangsa Hanang 8:13).

Anab-unji lingan, amben Kitungan a d’ong dernadage uggaran do itsumdaman batte gankilba. Kan ate yangam Daudo a onan a d’ong Solomon gadlamle: “Bar e on-hen Solomon, aman u’a-nam a Kitungan a d’ong galama, bar aman rojol-j’en do barij itsuman batte Anin a d’ong gangkila, iten asan gamlenden GAMANGtungan kuddub uggaran saijte, bar kuddub anogal anogandinji galamte. Bogad aman Anin a d’ong saijlenden, aman anin a d’ong rabangte, bindo bogad aman Anin a d’ong umdrenglenden, Anin d’ong-nam tarda ayam sikkoi ja umdrengtam” (1 Birinda 28:9). Amben mandran a d’ong er gankile Kitungan a d’ong gankilba sanabyun uggaran batte. A bara-lingan amben atiydamnaben dete, sanabyu uggaran do barij itsuman batte.

Anab-moloi lingan, man’oihan batte Kitungan a d’ong gankilba. Bibolan gamte: “Amben erdikale Gamangtungan a d’ong gangkilba, do man’oih kanenkenanji batte Anin a temangban yraiba” (Sanenken 100:2). Anin a temangan man’oihben. Do a tambusingan surda panuangbe. Kitungan agangkilte batte uggarben sayute. Tanahimdam Kitungan a onagji, mandrengmadtan sikoija Kitungan a d’ong gangkilba. Mandrengna-lingben abara do agangkiltabe atena murdadage.

Okiy Kinolbe absele: “Juda maranji a anartiyberanji asan amaddan do tanungjeng lingan barij lanadgadan batte gamangtungan a d’ong hen gangkillai” (Anappai 20:19).