Jan 23 – PURO VARAM

kob 1:17 Heryek sreshta yinaman, heryek puro varam swargema pedaven, jother Baper dayinthi avacha; Vor dai kunsi thedar chendi cheni.

Apaner Prabhu Yesu Christhu Vor beptar vasu Pavithar Athmar varalen gokan melmelocha. Yee Athmar varalema thu barobar renu katho vu prarthana karajethi ann viswasethi payer vacha.

Abba thar dallema hano soch ariviye, saasij Prabhu manna yee Athmar varalen dachakey? Maa vo varalen payerviye kai? Pan Dever vathema ataklethi kacha Ephesivalun 4:8, jethi Vu swargen vupadan, khaidvejena khaid karlen, manikyana varamena dinokan kemelocha.

Juno kararer dadema Athmar varal ghano kamvethi. Lapan Navvo kararema kanna chelavo bhalan vuncher gharema prarthana karretheyko janaj Pavithar Athmar varam kajako Abhishek sejivumper vutharan ayeejen dekacha. (Apostler kaam 2:4, Vosey Pavithar Athmathi bharan, Athma vunden dinojako varamer nai, dusro dusro vathema vathekarena shuru kidey.

Yee Pavithar Athmar varamethij Yesu saso Dev kan jagena malamkarer vacha. Vu varalethij thu anyulena Christhur achkhabarena malam kareja ann achamkalaro kamen ann bhavisyather vadi malamkrer sada payervacha. 1 Corinthivalun 14:1 vachanema dekatho, pemethi rena asakaro;Athmar varamena asakaro;Sethi jada pravachanamer varamen asakaro.

Kunvatho yee varalethi bharaye konthiko vu labbari bhoda kethey vusey aado jeevanethi samaan dekacha. Aaj saha masad viswasivun yee Athmar varaleper nammakam cheni. Yervadi samajer dall sada vunden cheni.

1 Corinthivalun 12:8-10 yee agadiyar kagadema 9 Athmar varalen dekacha, Kimkatho – yekena Athmathi genena bodhkarer vathan, vujjekena vu Athmathij akkal sikhayer vathan, vujjekena vu Athmathij viswasan, vujjekena vu Athmathij varukarer varaman, vujjekena achamkala karer joran, vujjekena pravachanam keran, vujjekena Athmana valakeran, vujjekena tharathara vatheykareran, vujjekena vather aradhker dencha. Yesey varal thar saruj gokan cha.

Hanoj 9 varal chaju 9 Athmar phal sada cha Galathivalun 5:22-23, Prema, khushi, samadhan, dheerethi khamler,, daya, achgun, vuswas, shanthi, bana haayi. Athmar phal ann Athmar varal doybee yekkaj vatema dikavnu.

Ghaney manikyana vunderema Athmar varalen pamelecha kan masaj badayi karthey garvamethi bharan racha kankren katho vunderema Athmar phal chenijethi. Mar premer Dever beptavo Athmar varalen ann Athmar phal sada palen Dever namena mahima karnu.

Ajji jada dhyan karen pado Paramer Geed 4:16.