Jan 20 – Barijloge Hadab!

“Anten asan engale ruang lingan a dakuten a U’a-ben hadab daku, ettele amben janang deba” (Mattiu 5:48).

Kan ate Kitungan a itsum do asanaisai amben hadab lingan a hanaben apsele do baralingan alum-lingan. Anten asan gadlamlanten: “Anten asan amben mariddam deba. Iten asan gamlenden Hen mariddam” (Lebi 11:45). “Ayengan a Kitungan battea Onan, manan; Gamangtung-lenJisu Kristun a artanurdu lingan . amben ganudi-ngan a bangle, Anin dernadage na” (1 Korintia 1:9). Kitunglen a janardin beran abpungele: “Gija, Aman alung-uggar-ling-hen janardin saijte; Aman j’e-ling-hen banuddi-Nam hanghangih” (Sanenken 51:6). Anin d’ong ambrij barijloge daku, ajardina Anin ambrij Hadab. Barijloge Hadab manglinglen adakuben ate, iten asan gamlenden Gamangtungan iteja manglen saring adsaje itente anlen oganditabe.

Bo arobjongberan, amben aboi sanna o’an daku, yagi mihnum dete. Kun ayam anin pedde gagaling raptite. Angante kan ambrij ayamling amben a d’ong ateng gagana baile adraptie idjapo? Kan duai U’an janang adlume. Kun ambrij, tanimhimdam ruang-lingan U’a-len d’onglen adbailangne itente anlen lumle adraptibe. Ateng asan, barij uggarben batte derdernaba do amben hadab ayamling lumle araptite, kuni na ate Kitungan mangben saring saite.

Kitunglen barijloge hadab a mukkan ambrij manglen saring asanaisajan. Edon kutta-lingan, Gamang Kitungan Mnadran a d’ong labo lingan saring durdisolan batte gabdelle do a hadab a mukkan tiyeten mandran a d’ong. Aten asan a mukkadaman tiyle do abgijtadamneten mandran amangba, do amu-lingan saring mandrengna taronghiman tiyle; do mandran amengmar dele.

Bogad amben sabja-sanangmar tangboi tangboi aran atiylenden, do kan batte aboi tebulan gabdelle tih gamle, amonna lingan yangam tebulan gabdelleben dete ogandeteroij, do gabdelte itente amona-lingan ogandele. Kun tebulan yangamle ogaleten kun ambrij hadab dele, atanakud-lingan bo bangsa tebulan gadelle ganabdelan batte. Kitunglen, d’onglen agabdelben asan – butente akahid daku pintu-lingan duai-lingan, barijloge hadab abmete. Derna-lingan, amben barij hadab abmeben asan, a mukkan tiyaiten.

Kun asan Anin abhanalangten amihaman batte hadab tagor-lingan, Abernan do Marid Janggardan. Tanahimdam Kitungan a onagji, raduloge dakunaba iten asan gamlenden nami kanalkal-ben, danuai-ben do er t’ul-ben sosote. Kitungan d’ong-ben gijgijte anari-margeted, bindo gugudage adainamarge. Anten asan, uggarben surpiddamnaba brijloge a hadab-ban amanrid-lingan!

Okiy Kinolbe absele: “Yante gamle tiki lingan kuddub-len thungan a Onan a ganalaman do dernan aboinan, manan, mayangmarge dean dele Kristun a banadrijan a lanangkan a tanaredban ardutabe.” (Episi 4:13).