Jan 15 – Notun noksa!

1 Corinthians 15:49 jinika amikhan sabole itu prithibi te banai diya manukhan nisina ase , thik inika nisina hi swarg te banai diya manukhan nisina bi amikhan hoi jabo.

Isor pora amikhan sob ke notun noksa dishe, jun khan Isor Jisu Krista te notun jonom hoishe. Itu  noksa  tu Isor Jisu Krista laga noksa nisina ase- jun swarg laga Isor ase. Apuni khan bi swarg te thaka khan nisina hi bodli hoi jaishe.

Olop sal agote ami ekta magazine te news purishe. Itu ekta parivaar laga report thakishe jun hi tai khan laga kala suwali ke sadi dibole mon jai. Bishi manu pora taike mana kurishe tai kala hua pora. Ses te tai laga ama baba dangor dehej dibole ulaishe ekta mota ke jun laga background bhal thakanai. Hoilebi itu chokri notun ghor te sadi hoi kene bi taike bishi khan  pora biya pai aru utu ghor te taike sonman nakure tai kala hua pora. Bishi dukh te thaka karone itu chokri tu suicide kuri loishe. Jitya ami itu report purishe ami bishi mon hoishe. Kali ekta verse hi ami laga mon tea he itu homoi te Song  of Solomon pora, “ami kala ase, hoilebi  sundor ase”.

Apuni itu prithibi te thaka homoi tok apuni khan adam laga pap pora kala hoi ken ease. Hoilebi Isor Jisu Krista pora apunike kitya bi mana kuranai hoilebi apuni uporte bishi morom thaki kene apuni ke bisari bole ahishe, apuni laga atma laga morom. Sob pap aru shrap khan dhulaishe tai laga khun pora, aru itu pora hi apuni ke sundor banai. Jitya apuni adam laaga pap pora kala hoi kene thakishe, titya apunike Krista te sundor banai dishe.

Apuni laga jibon laga sob dinkhan tea dam aru Krsita lagaadot khan pai. Hoilebi ekdin trumpet laga awaz hunibo. Jitya ses laga hala hobo titya ekbarte , suku bon kori kene khula pora bi joldi, amikhan bodli jabo.  Kilekoile jitya utu awaz hobo, titya junkhan mori jaishe taikhan aru kityabi nomoribole jinda hobo, aru amikhan sob bodli hoi jabo. kilekoile juntu moribole pare utu bodli hoi kene aru kityabi namoribole laga hobole lagibo; sob khotom hoi jabo parikhan kityabi khotom nahobole laga hoi jabo. 1 Corin 15:52-53

Juntu homoi pora itu trumpet bajibo, apuni khan ekta notun noksa hoi jabo. Sob prithibi laga adot khan sapha hoi jabo aru apuni swarg laga notun kapra lagabo. Apuni itu homoi pora kala aru biya nahobo hoilebi ekta sundor noksa te bodli hobo amikhan laga Jisu Krista nishina dikhibo.

Pobitro kotha pora amikhan ke koi 1 John 3:2 hoilebi amikhan itu jani ase jitya Jisu Krista ahibo, titya amikhan bi tai nisina hobo, kilekoile titya taike hosa pora sabole paribo. Itu swarg laga noksa te iku bi dagi  khan nathakibo, aru apuni bishi sapha thakibo. Aru apuni itu noksa te chamkibo. Kiman bi dangor din thakibo utu.

Aji bhabna kuribole laga  pobitro kotha tu hoile Isaiah 65:17 thakibi, ami banai notun swarg aru prithibi; aru purana khan tu yaad nahobo nahoilebi mon te na-ahibo.