Jan 14 – Tabme J’en!

“bindo j’en tabme delen asan banandan deba” (Romi 12:2).

Angante bo mandra Kristu lingan dakuten, anin tabme garadelan dele. Tabme garadelan adele asan, j’en janang bartabmeben dete. kan ambrij bartabme bo banandaban abanjingte. Anappai Pol gadlamlangten Bar kan ordaran a taramtamge abukkadamdong, bindo j’en tabme delen asan banandan deba, yanbe gamle itente, Kitungan, a bangsa, tungnajana do hadab’ itsuman dete, antate amben rapti a inidamben (Romi 12:2).

Pwrardan a anablu abo denna lingan adeben dete. Bindo j’en-ben bartabmelen do banadan deben dete, murdadaman a baran Kitungan a bernan kznol-le dakunaben dete do Kitungan a mandranji ampara mailen dakunaben dete. angante amben jaruloge garberna mandrengna-lingan ayirte, j’en-ben bartabmete.

Aparamangtan, anappai Pol idolle tabme j’en batte banandan dete, pintumaranji ate ted bindo ayengan amandranji Jisu Kristun amihaman batte anablu ahanglenji apsele, do ayengan amandranji janababan do ranoitadan adelenji apsele. Jananbaban do anablu amben kadabling araptite bindo banda j’enba.

Anab-bagu ate, Kitungan a d’ong gijgijba j’en-ben bartabmele abandanaben asan. Anin adgame d’onglen bandate gamle. Anin d’onglen andreng tabme gabdelaiten, amihaman batte. Anin tiybente tabme uggaran do tabme janggardan. Anin lahapurge tabme ranadun do tabme ranaptin tiybente. Anin a suyeman dile tagaldaban tabme. Angante Anin kan kudduban lumle, j’en-ben abanandan s’ilingben daku.

Nami, yangam abrtabmedamten amben? Jakub Idolle: “Anten asan kuddub pansardinate do danuaihan a tanardangan umdrengan umdrengle‘pwrarda-benji a rabrabben a ‘raptitenan angganu beman lanadgadan batte j aba” (Jakub 1:21). Kitungan a bernan batte adtabmeben dete j’en-ben, Kitungan a bernan jalle, Kitungan a bernan ambrij abhananaba do dernan batte Kitungan a bernan oblingba.

Kitungan a bernan mandrengnan do Janggardan na, do kan batte pwrarda lingan mandrengnan pangtai. Tanahimdam Kitungan a onagji, sattang Kitungan abernan batte, Sonuman a baran absidte. Bogad j’e-ling-ben Kitungan a berna barij dakulenden, do togal tamba tiy-j’enaben dete, er marid baranji d’ong-ben adhamaji.

Okiy Kinolbe absele: “Anten asan j’e benji a dian jiduban jidublen ambrij, kilkillen adlinglen dakunaba. Jisu Kristun a panunggen ayam lingan mangba ben a yertaian asuyeman abmele hadabloge derdemaba.” (1 Pitor 1:13).