Jan 13 – Notun saman!

Isaiah 65:17 thakibi, ami banaishe notun swarg aru notun prithibi; aru piche khan laga yaad nahibo aru  mon te nalobi.

Ekbar Jisu Krista gadarenes naam koi kene alag desh te ahishe hagor laga utu parte.aru jitya tai nau laga bahar te ulaishe, titya ekta manu achanak pora ulaishe beya atma buki kene, jun hi utu khurung (tomb) te manukhan logote thakishe; kun bi taike bandhibole paranai, shikli pora bi napare. Kilekoile taike  inika shikli khan pora bandhi thakilebi tai itu ke bahangai diye; aru kun bi taike shikabole bi napare. Aru sob rati aru din te bi tai utu khurung te hi thake, kandi thake aru nijor ke jhokhom kuri thake. (mark 5:1-5)

Jisu pora hudidhe tai ke itu koi kene, “apuni laga naam ki ase? Aru tai koishe ‘legion’ kilekoile bishi satan khan tai bhitorte ghushi kene thakishe (luke 8:30) roman army te legion laga motlob tu hoile, 6 hazar  sipahi aru ghora khan ase. Roman manu khan bi itu shabd tu bishi ginti kora homoi te koi.

Itu karone itu janibole pai ke utu manu laga bhitorte hazarta satan ghushi kene thakishe. Jitya Isor pora taikhan ke khedaishe itu manu laga gau baharte, tai khan gahori khan te ghushi jaishe junkhan pahar laga nichete dana khai thakishe aru itu khan dui hazar gahori thakishe. Aru itu gahori khan tu bishi biya pora hagor te polaishe aru dubi kene muri jaishe.

Itu homoi te hi itu manu laga jibon te bisi bhal badlav ahishe, junke satan lagai kene thakishe. Jun kapra nalagai kene berai thakishe tai itya tu kapra bi laga bole shuru hoishe. Tai jun laga dimag thik thakanai tai laga dimag itya thik thakishe (mark 5:15) tai Jisu laga theng te hi bohi jaishe (luke 8:35). Itu elka nahoi kene, Isor pora itu manu ke evangelist bi bonaishe. Pobitro kotha te koi ki itu manu tate pora jaishe aru Isor laga kotha Decapolis te  koi kene beraishe; aru sob hi achurit hoishe(mark 5:20)

Jitya Isor kunuba ke bachai tai pura hi bachai loi. Aru itu manu ekta notun jaibon paishe. Ekbar bhabna kuribi kiman bi tai dukh pai kene thakibole asile judi Jisu ke lok panai koile. Itu satan laga atma jun pora dui hazar gahori ke hagor te dubai dishe itu manu ke bi dubabol ethakishe. Aru tai ke narak laga hodai din laga jui te  juli bole thakishe. Jitya Isor manu laga jibon te ahe tai achurit pora hi manu khan laga jibon sonman pora bhorta kuri diye.

Ekbar apuni notun jibon pale, apuni khan pura jibon ke yaad nakuribo lage. Apuni khan janibo lage ki apuni khan ekta notun jibon hoishe, aru itu khushi aru utsah tu apuni laga notun jibon te thakibole lage.

Aji bhabna kuribole laga pobitro kotha tu hoile, Isaiah 43:18,19 purana saman khan ke yaad nakuribi, nahoilebi purana khan ke nalobi, thakibi, ami notun sman kuribo, itu khan hoi thaki ase, itya  apuni khan ituke dikhi ase . ami balulaga paharte ekta rasta banabo aru tate apuni khan ke dhara laga rasta dibo.