Jan 13 – Tabme Janabanji!

“Iten asan gamlenden gijba, Hen tabme riangan do tabme ordaran gabdeltai, bar purban ayam a bernanji anayiman orde anogalan janang adde-e” (Jisaya 65:17).

Gamangtungan Jisun yiraiten ordarban, bo maneng ganungan. Do angante Anin bungsangba yiraiten, abumung Anin rabangeten er marid janggardan batte adakulen amandran, butente turmurduba basule adakuneten amandran; buteja a d’ongan tolbadle adraptiadji, sikkardin batte janang, iten asan gamlenden Anin kuddub tadtadle sidle tanolbadanji. Sikkardin batte tolbaleji janang tadtadle sidle; buteja a d’ong tolbadle adraptiadji. Do togal tamba anin baru-lingan dakule do turmurduban janang, edalen anindam kurdamlen arengan batte dakule. (Mark 5:1-5).

Jisun uale a d’ongan, gamle, “Ahim-nam iten? Anin gameten, Kunuduai, iten asan gamlenden anin amang lingan ateng aggarda kulman ganleji. (Luk 8:30). Rominji a sanumarji, gamlenden ‘Legion’ yakurdi ajar sanumaranji do gardi-kuranji batte hanandraman dete. Rominji janang kan ate handramteji.

Aten asan galamle raptitabe bangsale, koti-lingan ajar-ajar kulmanji dakule. Angante Gamangtungan amangan saring amdungetenji, aninji kambunanji amangban iyle ganaji do baruban dayerleji – aninji bagu ajar dakuleji. Aten saring kambunanji ganunban abrijlingji, do ganunlingan pangdaleji.

Kun ayam lingan, kun mandran amandrengna bo surda banandan hangle, ayengan amandran hamkulle dakule. Butente aputan dakule anin nami jzjzneten. Anin kikkamar dakule, nami anin bangsamar dele (Mark 5:15). Anin Jisun ajingban goble (Luk 8:35). Kun sattang ted, bindo Kitungle a d’ongan bangsa anoblingmar abmele. Bibolan gadlamlangten anin yirle do hanangan tiyle itente Jisun amanglingan lumle; do kuddub galamleji (Mark 5:20).

Angante Kitungan ablute bo mandran, anin ajardina barij gamle anablun hangte. Do kun mandran tabme garadilan dete. ogandile gijba yangan a baran kan ambrij, bogad anin Jisun batte abmaineteden! Kun kulmanji bagu ajar ate itente kambun-lingan ganleji do yirleji ganunlingan, anin a d’ongan janang kun ganun-lingan iyte-badih galue. Anin badih togi sing-lingan galute badih. Angante Kitungan maineten, amandrengan bandaneten bo handramdage amandran ambrij.

Amben angante banandan ahangte tabme garadil-lingan, amben papwran ate aogandidong. Amben aogandiben dete do Kristun batte tabme garadilan adele, do m’oihling tabme garadilingan dakunaba.

Okiy Kinolbe absele: “Amben purban a bernan ayimdong do papwr bernanji a ogaldong. Gijba, Hen aboi tabme baran lumtai; kanate namihen padabte…..” (Jisaya 43:18, 19).